Debat i zjarrtë në Kuvend: Hoti e quajtë Muratin “mashtruesi më i madh”, përplasen edhe me deputetin e VV-së

Një atmosferë e tensionuar ka kapluar Kuvendin e Kosovës gjatë diskutimeve për Projektligjin e buxhetit për vitin 2027, ku përplasja verbale mes deputetit të Lidhjes Demokratike të Kosovës, Avdullah Hoti, dhe ministrit të Financave, Hekuran Murati, ka degjeneruar në akuza të rënda. Konfrontimi nisi në momentin kur ministri Murati zgjodhi të mos përfshihej në diskutimin e hapur me deputetin opozitar, duke pohuar se nuk kishte ndonjë interes për një gjë të tillë. Ky arsyetim shkaktoi menjëherë pakënaqësinë e Hotit, i cili zgjodhi t'i përgjigjej ministrit me fjalë të ashpra nga foltorja. “Me këtë nuk bëhet debat. Nuk je i interesuar, sepse je mashtruesi më i madh që ka pasur ky vend”, ishte deklarata e drejtpërdrejtë e deputetit Hoti drejtuar kreut të financave. Tensioni në sallë u rrit edhe më shumë kur në diskutim u përfshi deputeti i Lëvizjes Vetëvendosje, Valon Hoti, i cili ndërhyri për të kundërshtuar pretendimet e ish-kryeministrit, duke e akuzuar se nuk po paraqiste të vërtetën para qytetarëve. Reagimi i Avdullah Hotit ndaj deputetit të mazhorancës ishte i menjëhershëm, duke i kërkuar atij që të ruante qetësinë dhe të mos e pengonte gjatë kohës që po fliste. “Të lutem, veç rri në vend tandin”, ka përfunduar replikën e tij deputeti i LDK-së.