Bashkë me Jude te “Tre Luanët”, Jobe Bellingham zbulon emocionet e ftesës historike

Ëndrra e përbashkët e dy vëllezërve për të veshur fanellën e kombëtares A është shndërruar zyrtarisht në realitet. Jobe Bellingham është bashkuar me kampin stërvitor të Përfaqësueses së Anglisë krah vëllait të tij, Jude, duke shënuar një moment të rrallë dhe historik në rrugëtimin e tyre sportiv. Mesfushori 21-vjeçar fitoi thirrjen e tij të parë nga trajneri Thomas Tuchel, pas paraqitjeve të nivelit të lartë si me kombëtaren U21 të Anglisë, ashtu edhe me klubin e Borussia Dortmundit, ku ka dhënë tri asiste gjatë këtij edicioni. Nëse do të ketë minuta aktivizimi në sfidat e ardhshme të Ligës së Kombeve kundër Kroacisë dhe Spanjës, dy vëllezërit Bellingham do të shkruajnë histori duke u bërë çifti i 22-të i vëllezërve që përfaqësojnë fanellën e Anglisë. “Nuk mund ta anashkaloj këtë fakt. Prania e Jude këtu e bën situatën fantastike për familjen tonë,” theksoi Jobe Bellingham. “Sinqerisht, është diçka vërtet e veçantë. Është një bonus i jashtëzakonshëm që i shtohet një përvoje tashmë të mrekullueshme. Të thirresh në kombëtaren e Anglisë është një ëndërr më vete dhe gjithmonë kam ndjerë krenari të madhe që kam pasur mundësinë ta përfaqësoj Anglinë në çdo grupmoshë,” shtoi talenti i ri. “Të kesh mundësinë dhe shansin për të përfaqësuar Anglinë krah vëllait tim është vërtet e vështirë ta përshkruash me fjalë. Mendoj se vetëm fjala ‘emocion’ mund ta përshkruajë. Shpresoj që, nëse vjen ai moment, do të shihni shumë emocion nga të gjithë të përfshirët dhe sigurisht, nga familja ime“, shtoi më tej ai. “U ndjeva tejet i gëzuar dhe i emocionuar. Dhe pastaj, kur e mora në telefon më vonë, m’u duk diçka krejtësisht joreale,” tregoi mesfushori i Borussia Dortmundit. “Nuk di vërtet si të reagosh në një moment të tillë, por thjesht ndihesh kaq i lumtur”. “Nuk mund ta ndaloja buzëqeshjen. Ndihem vërtet, thellësisht krenar. Ishte diçka që e shpresoja dhe ndieja se, me kalimin e çdo jave, ndeshje pas ndeshjeje, po e bëja atë një mundësi gjithnjë e më reale. Pra, po, jam vërtet shumë i lumtur“, përfundoi Jobe Bellingham.