Trafik i rrezikshëm në Ferizaj: Tre drejtues mjetesh përfundojnë në rrjetën e policisë, njëri kapet me 156 km/h

Efektivët e stacionit policor në Ferizaj, në bashkëpunim me Njësinë e Komunikacionit Rrugor, kanë ndërmarrë masa ndëshkimore ndaj tre shoferëve të cilët janë konstatuar duke shkelur rëndë rregullat e qarkullimit rrugor. Këto shkelje janë regjistruar gjatë aksioneve në rrugën “Brahim Ademi” si dhe në fshatin Lloshkobare të Ferizajt. Sipas njoftimit zyrtar, masat e marra ndaj kundërvajtësve janë si vijon: – A.H., 33 vjeç, u konstatua me 2.11 promilë alkool në gjak. Ndaj tij u shqiptua gjoba prej 500 eurosh, iu vunë 3 pikë negative dhe iu hoq e drejta e drejtimit të mjetit për një periudhë 12-mujore. – E.S., 19 vjeç, u ndëshkua me 500 euro gjobë, 5 pikë negative dhe 6 muaj ndalim të drejtimit të automjetit, pasi po ngiste makinën ndërkohë që ishte në fuqi masa e tij mbrojtëse nga data 27.08 deri më 26.11.2026. Atij i është konfiskuar edhe automjeti. – E.M., 30 vjeç, u gjobit me 500 euro, 5 pikë negative dhe iu ndalua drejtimi i automjetit për 6 muaj, për shkak se po qarkullonte me shpejtësi skajshmërisht të lartë. Në një zonë ku shpejtësia e lejuar ishte vetëm 50 km/h, ai është matur duke lëvizur me 156 km/h. Në përfundim, Drejtoria Rajonale e Policisë në Ferizaj u bën thirrje të gjithë drejtuesve të mjeteve dhe pjesëmarrësit e tjerë në trafik që t'i përmbahen me përpikëri sinjalistikës dhe rregullave në rrugë, duke theksuar se sjellje të tilla të papërgjegjshme përbëjnë rrezik fatal për jetën e tyre dhe të qytetarëve të tjerë.