Tmerri 12-orësh në Prizren dhe Prishtinë: Pesë shtetas turq prangosen për rrëmbim, dhunë dhe kanosje

Operacioni i Policisë së Kosovës ka çuar në arrestimin e pesë shtetasve turq në Prizren, të cilët dyshohen se janë përfshirë në disa vepra të rënda penale, përfshirë shtrëngimin, privimin e kundërligjshëm të lirisë dhe lëndimet e lehta trupore. Sipas informacioneve zyrtare të forcave të rendit, ngjarja e rëndë ka nisur më 3 nëntor në rrugën “Ekrem Rexha” në Prizren. Pesë të dyshuarit fillimisht kanë sulmuar fizikisht një shtetas tjetër turq, të cilin më pas e kanë futur me forcë në një automjet transportues të tipit “pick-up”. Në dëshminë e tij dhënë para organeve hetuese, viktima ka treguar se gjatë agresionit fizik ka pësuar plagë të shumta, përfshirë edhe lëndime të shkaktuara nga një mjet i mprehtë, konkretisht thikë. Ai është transportuar pa dëshirën e tij në një hapësirë të mbyllur në kryeqytet, në Prishtinë. Në atë lokacion, i dëmtuari është mbajtur peng për afër 12 orë rresht. Gjatë kësaj kohe, ai është detyruar nën presion që të heqë dorë nga projektet ndërtimore që po zhvillonte në një kompleks banesor në qytetin e Prizrenit. Pas një pune intensive hetimore dhe operative, gjatë datave 9 dhe 10 nëntor, strukturat policore arritën të bien në gjurmët e autorëve, duke i identifikuar, lokalizuar dhe vënë në pranga të pesë të dyshuarit, të cilët gjithashtu janë shtetas të Republikës së Turqisë. Në kuadër të hetimeve, automjeti i përdorur për kryerjen e këtij krimi është lokalizuar dhe sekuestruar përkohësisht me urdhër të Prokurorisë së Shtetit. Ndërkaq, me vendim të prokurorit kompetent, pesë të arrestuarve iu është caktuar masa e ndalimit policor prej 48 orësh. Autoritetet kompetente po vazhdojnë hetimet për zbardhjen e plotë të rrethanave të ngjarjes, ndërsa rasti po trajtohet zyrtarisht për veprat penale “Shtrëngim”, “Privim i kundërligjshëm i lirisë” dhe “Lëndim i lehtë trupor”.