Skenderaj ngrihet në mbrojtje të vlerave të UÇK-së: Kuvendi Komunal miraton njëzëri deklaratën “Jo në emrin tim”

Komuna e Skenderajt i ka dhënë dritën jeshile rezolutës së titulluar “Jo në emrin tim”, e cila synon të kundërshtojë vendimin dënues të shkallës së parë të Gjykatës Speciale në Hagë ndaj ish-udhëheqësve të Ushtrisë Çlirimtare të Kosovës. Kryetari i kësaj komune, Sami Lushtaku, ka theksuar me bindje se përpjekja e UÇK-së ka qenë një luftë e pastër për liri dhe çlirim kombëtar. “Faleminderit të gjithë anëtarëve të Kuvendit Komunal të Skenderajt për mbështetjen njëzëri të propozimit tim për miratimin e Deklaratës “JO NË EMRIN TIM”, përmes së cilës shprehim mospajtimin me aktgjykimin e shkallës së parë të Gjykatës Speciale ndaj ish-krerëve të UÇK-së, solidariteti me familjet e tyre dhe ritheksohet se lufta e Ushtrisë Çlirimtare të Kosovës ishte luftë për liri dhe çlirim”, ka deklaruar ai. Lushtaku shtoi se ky vendim i marrë nga Kuvendi Komunal shërben si dëshmi e qartë se populli i Kosovës nuk pajtohet me vendimet e Gjykatës Speciale. “Ky votim i njëzëshëm është një dëshmi e qëndrimit të përbashkët të Kuvendit dhe qytetarëve të Skenderajt: “JO NË EMRIN TIM!” Mirënjohje për secilin anëtar që e mbështeti këtë deklaratë!”, ka përfunduar Lushtaku.