Kryetari i LSDM-së, Venko Filipçe: Si do t’ua arsyetoni pensionistëve kufizimin e mjeteve të tyre në Alta Bank?

Kryetari i LSDM-së, Venko Filipçe, ka reaguar ashpër ndaj situatës së krijuar rreth Alta Bankës, duke ngritur shqetësimin për vështirësitë me të cilat po ballafaqohen qytetarët dhe bizneset vendase. Gjatë një paraqitjeje në televizionin Sitel, ai solli në vëmendje skenat e pensionistëve që presin në radhë të gjata para degës së kësaj banke në Manastir, të cilët nuk mund t'i tërheqin plotësisht kursimet e tyre, por vetëm deri në dhjetë mijë denarë. Filipçe theksoi se pasojat e kësaj krize po bien direkt mbi shpatullat e qytetarëve dhe kompanive, duke ia faturuar përgjegjësinë kryeministrit Hristijan Mickoski, për të cilin tha se ka lejuar një situatë të tillë të degraduar. Sipas kreut të opozitës socialdemokrate, LSDM-ja kishte ngritur alarmin që në muajin dhjetor të vitit të kaluar, duke shprehur dyshime të forta mbi prejardhjen e kapitalit të kësaj banke. Ai ngriti akuza se bëhet fjalë për një institucion financiar i cili dikur ka funksionuar si zyrë këmbimi valutor, ndërsa tani ekzistojnë dyshime se në tregun tonë ka depërtuar me kapital të dyshimtë, të përfituar nga marrëveshje korruptive dhe kriminale në Serbi, si dhe me dyshime për pastrim parash nga trafiku i narkotikëve.