Uashingtoni ngre akuza penale ndaj tre individëve të lidhur me Iranin për plane sulmesh në SHBA dhe Evropë

Departamenti Amerikan i Drejtësisë (DOJ) ka zyrtarizuar akuzat kundër tre personave të mbështetur nga Teherani, të cilët dyshohet se qëndrojnë pas një sërë planesh për sulme terroriste në territorin amerikan dhe atë evropian. Sipas autoriteteve në SHBA, agjentët iranianë së fundmi kishin organizuar një komplot terrorist në një bazë ajrore në Mbretërinë e Bashkuar, duke iu referuar ngjarjes së muajit shtator pranë bazës RAF Fairford, ku ishin vendosur trupat ushtarake amerikane. Hetimet tregojnë se njëri prej të dyshuarve, i pajisur me dy shtetësi (iraniane dhe irakiane), kishte komunikuar me bashkëpunëtorë në Britani direkt nga një qeli paraburgimi në Nju Jork, ku po pret procesin gjyqësor për vepra të mëparshme penale. Ndërkohë, dy të pandehurit e tjerë dyshohet se kanë operuar nga brenda territorit të Iranit. Në krahun tjetër, zyrtarët në Teheran kanë hedhur poshtë me forcë çdo lidhje apo përfshirje në incidentin e regjistruar në afërsi të bazës RAF Fairford. Autoritetet britanike kanë vënë në pranga shtatë persona në lidhje me këtë ngjarje, e cila u zbulua pasi autoritetet morën njoftime për praninë e furgonëve të dyshimtë afër perimetrit të bazës ajrore. Në bazë të dokumenteve të publikuara nga Departamenti Amerikan i Drejtësisë, prokuroria ka ngritur akuza zyrtare ndaj Mohsen Mohajeri, shtetasit irakian Mohammad Ali al-Hassani, si dhe ndaj personit me dy shtetësi, Mohammad Baqer Saad Dawood al-Saadi.