Gjoba prej 1.3 milionë eurosh nga Gjykata e Brazilit: Meta akuzohet për anësi zgjedhore në favor të Flavio Bolsonaros

Gjykata e Lartë Zgjedhore e Brazilit ka ndëshkuar gjigantin e teknologjisë Meta me një gjobë prej 1.3 milionë eurosh, pasi dyshohet se ka shkelur rregullat elektorale dhe ka favorizuar kandidaturën e Flavio Bolsonaros gjatë procesit zgjedhor. Vendimi historik u mor në mënyrë unanime, me 7 vota pro dhe asnjë kundër. Kjo çështje erdhi pas një kërkese zyrtare të dorëzuar nga ekipi i fushatës së Presidentit Luiz Inácio Lula da Silva, të cilët ngritën akuza se kompania kishte anuar nga rivali i tyre përgjatë raundit të dytë të zgjedhjeve. Sipas denoncimit të koalicionit, Instagrami pati bllokuar reklamat e fushatës së Lulës për afro 24 orë, gjatë periudhës 9-10 tetor. Ndonëse Meta u mbrojt duke e cilësuar këtë si një problem teknik me shtrirje globale, trupi gjykues analizoi gjithashtu edhe sjelljen e inteligjencës artificiale të platformës WhatsApp. Gjatë verifikimeve u konstatua se asistenti virtual kishte refuzuar të krijonte një imazh fushate që mbante emrin e Lulës dhe numrin 13, i cili përfaqëson kodin e subjektit të tij politik në fletëvotim. Megjithatë, i njëjti sistem kishte lejuar një kërkesë të ngjashme për Flavio Bolsonaron, duke përfshirë numrin 22 të partisë së tij. Në lidhje me këtë vendim, gjyqtari Nauê Bernardo theksoi se bëhet fjalë për një shkelje të rëndë, e cila sipas tij ka pasur ndikim të drejtpërdrejtë në rezultatin e zgjedhjeve në vend.