Kosto goditëse për industrinë: Biznesmeni prizrenas përballet me faturë rryme prej afro 158 mijë eurosh në muaj

Rritja e çmimit të energjisë elektrike po godet rëndë sektorin e prodhimit në Kosovë. Biznesmeni nga Prizreni, Alajdin Fusha, ka ngritur alarmin mbi kostot e papërballueshme me të cilat po përballen ndërmarrjet vendore, duke bërë publike një faturë mujore të energjisë prej rreth 157 mijë eurosh që fabrika e tij ka pranuar nga kompania KESCO. Sipas të dhënave të bëra publike prej tij, fatura e pranuar më 9 nëntor 2026 arrin vlerën e saktë prej 157,884.67 eurosh, e cila mbulon shpenzimin e 505,974 kilovat-orëve (kWh) energji elektrike. Fusha ka sqaruar se, pas llogaritjes së të gjitha taksave shtesë, duke përfshirë shërbimet e rrjetit, furnizimin dhe TVSH-në, çmimi real për një kilovat-orë arrin në 0.312 euro ose 31.2 centë. Drejtuesi i këtij biznesi ka ngritur pyetjen shqetësuese se si mund të ruhet qëndrueshmëria dhe konkurrueshmëria e prodhimeve vendëse në treg me këtë nivel shpenzimesh. Ai vuri në dukje se energjia përbën një nga zërat kryesorë të shpenzimeve në industrinë përpunuese, çka reflektohet drejtpërdrejt te çmimi përfundimtar i produkteve, ruajtja e vendeve të punës si dhe mundësitë për investime të reja. Për të ilustruar barrën e rëndë financiare, Fusha mori si shembull sektorin e përpunimit të qumështit dhe produkteve bujqësore, ku kompanitë duhet të përballojnë njëkohësisht koston e lëndës së parë, energjisë, ambalazhimit, pagave të punonjësve, transportit dhe tatimeve. Edhe pse ndërmarrja e tij ka instaluar më parë panele solare për të ulur varësinë nga rrjeti elektrik, ai shprehu shqetësimin për fabrikat e tjera që nuk kanë pasur mundësi financiare për investime të tilla. Në këtë kuadër, biznesmeni i është drejtuar publikisht ministres së Ekonomisë, Mimoza Kusari-Lila, duke kërkuar ndërhyrjen e institucioneve për krijimin e mekanizmave mbrojtës për prodhuesit vendorë. Ai bëri një paralele me diskutimet e fundit për monitorimin e tregut të naftës dhe mundësinë e vendosjes së çmimit tavan për derivatet, duke pyetur nëse masa të ngjashme mund të zbatohen edhe për energjinë elektrike. “Nuk po kërkojmë energji falas. Nuk po kërkojmë privilegje. Po kërkojmë kushte ekonomikisht të përballueshme për të prodhuar në Kosovë”, ka deklaruar Fusha. Ai po ashtu ka paralajmëruar se kostot e larta mund t’i detyrojnë prodhuesit të rrisin çmimet për konsumatorët, të ulin volumin e prodhimit, të pezullojnë investimet apo edhe të ndërpresin tërësisht veprimtarinë e tyre. Së fundi, Alajdin Fusha u ka bërë thirrje urgjente Qeverisë, Ministrisë së Ekonomisë, Zyrës së Rregullatorit për Energji (ZRRE) dhe institucioneve të tjera përgjegjëse që të analizojnë pa vonesë koston e energjisë për industrinë përpunuese, transparencën në formimin e çmimeve dhe lehtësimin e mbështetjes për investimet në energji të ripërtëritshme.