Tragjedi në Los Angeles: Një SUV përplas për vdekje tre persona dhe plagos rëndë disa të tjerë pranë stacionit të metrosë

Një ngjarje e rondë ondi të martën pasdite në lagjen North Hollywood të Los Angeles, në Kaliforni, ku një automjet tip SUV ka goditur një grup shitësish ambulantë dhe këmbësorësh. Si pasojë e këtij aksidenti tragjik, të paktën tre persona kanë ndërruar jetë në vendngjarje, ndërsa disa të tjerë kanë pësuar lëndime të rënda. Incidenti ka ndodhur rreth orës 17:55, pranë hyrjes së një stacioni metroje në një kryqëzim mjaft të populluar të zonës. Sipas të dhënave nga Departamenti i Policisë së Los Angeles (LAPD), automjeti i bardhë ka goditur të paktën pesë këmbësorë. Ndërkohë, Departamenti i Zjarrfikësve ka konfirmuar se viktimat humbën jetën menjëherë nga përplasja, kurse të plagosurit u dërguan me urgjencë drejt spitaleve të zonës, ku po marrin trajtim mjekësor në gjendje kritike. Mes të lënduarve rëndë është edhe vetë drejtuesi i mjetit, një burrë rreth të 60-ave, i cili aktualisht ndodhet i shtruar në spital nën kujdesin e mjekëve. Forcat e rendit kanë nisur një hetim të gjerë për të zbardhur shkaqet e plota të kësaj ngjarjeje. Kapiteni i policisë, Warner Castillo, bëri të ditur se po realizohen ekzaminimet e nevojshme për të kuptuar nëse shoferi ka qenë nën efektin e alkoolit apo lëndëve narkotike gjatë drejtimit të mjetit. Grupi hetimor po analizon gjithashtu pamjet e kamerave të sigurisë nga bizneset përreth dhe stacioni i autobusëve, për të zbardhur dinamikën e plotë të aksidentit. Shefi i Policisë së Los Angeles, Jim McDonnell, siguroi se hetimet do të jenë gjithëpërfshirëse për të hedhur dritë mbi rrethanat e tragjedisë. Nga ana e saj, kryetarja e bashkisë së qytetit, Karen Bass, dërgoi ngushëllimet e saj të sinqerta për familjarët e viktimave dhe shprehu mbështetjen për të gjithë të prekurit nga kjo ngjarje e rëndë. Autoritetet lokale konfirmojnë se procesi hetimor është ende në zhvillim e sipër dhe pritet të dalin detaje të reja lidhur me identitetin e viktimave, si dhe mbi ecurinë shëndetësore të personave që po luftojnë për jetën në spital.