Moti i paqëndrueshëm këtë të mërkurë, ja ku do të ketë reshje shiu dhe shtrëngata

Për ditën e nesërme, e mërkurë, territori i vendit tonë do të karakterizohet nga kushte atmosferike të paqëndrueshme, të cilat do të sjellin ndryshime në pamjen e motit. Sipas parashikimeve meteorologjike, vendi do të mbizotërohet nga vranësira mesatare deri të dendura, të shoqëruara herë pas here me intervale me diell me kohëzgjatje të shkurtër. Reshjet e shiut do të bëjnë praninë e tyre qysh në orët e para të mesnatës. Në zonat e veriperëndimit, jugperëndimit dhe pjesërisht në qendër, shirat do të jenë me intensitet të ulët, ndërsa në zona të caktuara reshjet pritet të fitojnë intensitet deri mesatar, duke u paraqitur në formën e shtrëngatave të shoqëruara me shkarkesa elektrike. Sa i përket erës, ajo do të fryjë me drejtim nga juglindja në jugperëndim, me një shpejtësi mesatare prej 7 metra në sekondë. Megjithatë, përgjatë vijës bregdetare dhe në zonat luginore, pritet që era të forcohet ndjeshëm, duke arritur shpejtësi deri në 17 metra në sekondë. Në det, kushtet do të pasqyrohen me një valëzim që do të jetë i forcës 3 deri në 4 ballë.