Karamuço zbardh rrezikun e lartë: Altin Dumani, prokurori më i kërcënuar nga krimi i organizuar në vend

Eksperti i kriminalistikës, Ervin Karamuço, ka ngritur alarmin mbi sigurinë e drejtuesve të prokurorisë së posaçme, duke theksuar se hetuesit e SPAK përballen në vijimësi me kërcënime serioze për jetën. Sipas Karamuços, në krye të listës së personave më të rrezikuar nga krimi i organizuar në Shqipëri aktualisht qëndron kreu i SPAK, Altin Dumani. Ky nivel i lartë rreziku lidhet drejtpërdrejt me dosjet voluminoze dhe hetimet sensitive që ai po udhëheq, të cilat kanë prekur interesa të mëdha kriminale. Në një prononcim për emisionin 'Now', eksperti shpjegoi se për shkak të kërcënimeve konstante ndaj tij dhe familjarëve të tij, është vendosur që Dumani të ketë një mbrojtje të përforcuar. Një strukturë e posaçme e vlerësimit të riskut ka konstatuar nevojën për masa urgjente dhe konkrete të sigurisë për prokurorin. Karamuço nënvizoi se kjo situatë nuk është e izoluar, pasi e gjithë trupa e SPAK përballet përditë me presione të rënda. Ai kujtoi se incidentet kanë shkuar deri në konfrontime me armë zjarri, siç ndodhi në Fier, ndërsa shtoi se ka pasur edhe raste të tjera kërcënimesh në Tiranë e Durrës, të cilat nuk janë bërë të ditura për publikun.