Aksion i gjerë policor: Tetë shoferë përfundojnë në pranga për shkelje të rënda të trafikut

Ministria e Punëve të Brendshme e Maqedonisë së Veriut ka njoftuar se gjatë 24 orëve të fundit, në zona të ndryshme të vendit, efektivët e policisë kanë arrestuar tetë persona për shkak të veprës penale “drejtim i pakujdesshëm i automjetit”, e sanksionuar sipas nenit 297-a të Kodit Penal. Nga numri total i të ndaluarve, gjashtë prej tyre janë kapur duke drejtuar automjetin pa poseduar patentë shoferi. Bëhet fjalë për shtetasit: Sh.J. (57) dhe K.B. (18) nga Shkupi, M.A. (30) nga Tetova, I.H. (26) nga fshati Ulanci i Komunës së Gradskos, si dhe N.D. (19) nga Prilepi dhe V.S. (22) nga fshati Zapolzhan i rrethinës së Prilepit. Ndërkaq, dy persona të tjerë, A.J. (29) nga Manastiri dhe Sh.S. (38) nga Kërçova, janë kapur duke vozitur përkundër faktit se kishin masë aktive të ndalimit të drejtimit të automjetit. Pas zbardhjes së plotë të këtyre rasteve, ndaj tyre do të pasojnë kallëzime përkatëse penale. Me këtë rast, MPB u ka bërë apel të gjithë pjesëmarrësve në komunikacion që të tregohen të përgjegjshëm dhe t'u përmbahen strikt rregullave të trafikut. Institucioni ka theksuar rëndësinë e shmangies së drejtimit të automjetit pa provim të dhënë, gjatë periudhës së ndalimit apo nën ndikimin e alkoolit, me qëllim garantimin e një sigurie më të lartë për të gjithë qytetarët në rrugë.