Aflatoksina në qumësht, shtrëngohen masat: Bllokohen 105 tonë misër, digjitalizohen kontrollet doganore

Pas shqetësimeve të ngritura mbi praninë e niveleve të larta të aflatoksinës M1 në produktet e qumështit, Kryeinspektori i Përgjithshëm, Dashnor Sula, ka bërë publike një sërë masash urgjente për të garantuar standardet e sigurisë ushqimore në vend. Në fokus të këtyre ndërhyrjeve janë kontrollet më të rrepta në pikat kufitare dhe monitorimi i ngushtë i lëndëve të para që përdoren për ushqimin e kafshëve. Sula bëri të ditur se autoritetet kanë ndërmarrë veprime konkrete ndaj dy subjekteve që merren me importin e misrit, duke bllokuar ngarkesat e tyre. Një ndryshim rrënjësor pritet të ndodhë në 13 pikat doganore të vendit, ku metodat tradicionale të kontrollit me blloqe fizike do të zëvendësohen nga një sistem i plotë digjital, i integruar direkt me Autoritetin Kombëtar të Ushqimit (AKU). Lidhur me rastet e misrit të kontaminuar që vinte nga Serbia, Kryeinspektori konfirmoi se janë marrë masa disiplinore ndaj personelit përgjegjës. “Që në muajin mars, kur u evidentuan problematikat me misrin nga Serbia, kam urdhëruar shkarkimin e nëntë inspektorëve në pikën doganore të Hanit të Hotit. Synimi ynë është kalimi në një sistem monitorimi online, duke eliminuar çdo mundësi për gabime njerëzore apo shmangie procedurale,” deklaroi Sula. Bilanci për vitin 2026 tregon një angazhim intensiv të strukturave, me 3,504 kontrolle të kryera mbi importet e ushqimit për kafshët dhe 54 inspektime të drejtpërdrejta në terren. Nga testimet laboratorike të 53 mostrave, janë bllokuar gjithsej 105.6 tonë misër që nuk përmbushte kriteret e sigurisë. Aktualisht, 51.3 tonë prej këtij produkti janë asgjësuar, ndërsa pjesa tjetër prej 54.3 tonësh është në proces e sipër për t'u larguar përfundimisht nga tregu.