Specialja dhe Presidenca në tavolinë: A po shkojnë drejt një aleance PDK-ja dhe Vetëvendosja?

Përplasja e ideve dhe mundësia e një bashkëpunimi të ngushtë ndërmjet Partisë Demokratike të Kosovës dhe Lëvizjes Vetëvendosje janë rikthyer fuqishëm në fokusin e opinionit publik, pas tryezës së fundit të zhvilluar mes kryetarit të PDK-së, Bedri Hamza, dhe kryeministrit Albin Kurti. Në qendër të këtij dialogu po pozicionohet nisma ligjore për ndryshimin e Ligjit për Dhomat e Specializuara të Kosovës me seli në Hagë. Për këtë çështje, opozita ka sinjalizuar gatishmëri për ta shqyrtuar dhe mbështetur me votë, ndërkohë që në agjendën e bisedimeve mes Hamzës dhe Kurtit ka zënë vend edhe procesi i zgjedhjes së shefit të ri të shtetit. Duke folur për gazetarët para nisjes së punimeve në Kuvend, kreu i PDK-së konfirmoi se tema e presidencës është prekur gjatë takimit me kreun e ekzekutivit, pavarësisht se nuk është diskutuar me emra të përveçëm. “Nuk kemi shkuar për emrat, nuk i kemi folur, nëse kalohet ligji jemi të hapur edhe për tema tjera”, pati deklaruar Hamza, duke nxitur dilema të reja nëse ky proces mund të shërbejë si trampolinë për një akordim më të gjerë ndërmjet dy forcave kryesore, sidomos në prag të zgjedhjes së presidentit. Megjithatë, nga kampi i Lëvizjes Vetëvendosje kanë ardhur mesazhe se një bashkëpunim për çështje të caktuara nuk nënkupton domosdoshmërisht nisjen e një koalicioni gjithëpërfshirës qeverisës. Kryetarja e Kuvendit, Albulena Haxhiu, ka bërë të ditur se një partneritet zyrtar me PDK-së nuk është i domosdoshëm, duke sugjeruar se koordinimi i veprimeve mund të arrihet edhe pa ndërtuar një aleancë të përbashkët qeverisëse. “Për të pasur një qëndrim unifikues me 16 shtatorin, nuk na duhet një koalicion i përbashkët. Na duhen veprime të përbashkëta, unifikim për secilin veprim që kemi përpara, kontribut nga secila palë”, ka theksuar Haxhiu, duke qenë mjaft e prerë sa i takon skenarit të koalicionit. Ajo shtoi më tej se bashkëpunimi mund të shtrihet vetëm te kundërshtimi i një vendimi të padrejtë si ai i 16 shtatorit, duke përjashtuar idenë e PDK-së si partnere në qeverisje, sipas bindjes së saj personale. Këto qëndrime divergjente lënë të hapur enigmën nëse dy partitë po arrijnë vetëm një konsensus të ngushtë për tema specifike, apo nëse takimi i nivelit të lartë paralajmëron një pazar politik më afatgjatë. Në njërën anë, PDK-ja mban dyert e hapura për biseda të tjera pas votimit të Speciales, ndërsa Vetëvendosja insiston se uniteti parlamentar nuk barazohet me bashkëqeverisje. Kjo situatë e bën edhe më sfiduese arritjen e një konsensusi për kreun e shtetit dhe shtron pyetjen vendimtare nëse projektligji për Gjykatën Speciale mund të kthehet në çelësin e një kompromisi më të gjerë politik në vend. Në një vlerësim të dhënë lidhur me këto zhvillime, analisti Gani Qarri ka theksuar se pas takimit ndërmjet Bedri Hamzës dhe Albin Kurtit, dhe në dritën e afatit për zgjedhjen e presidentit të ri, spektri politik duhet të orientohet drejt një marrëveshjeje gjithëpërfshirëse dhe jo vetëm drejt dakordimeve parciale.