Vazhdon gara në Superligë, ndeshje interesante në Gjakovë e Podujevë

Pas pushimit për shkak të ndeshjeve të Kombëtareve, këtë mesjavë vazhdon gara në Superligën e Kosovës në hendboll në konkurrencë të meshkujve. Në program është xhiroja e shtatë, kurse zhvillohen disa ndeshje interesante. Të mërkurën vëmendja do të jetë në palestrën “Shani Nushi” në Gjakovë, ku nga ora 19:00 takohen Vëllaznimi dhe Kastrioti. Kampioni aktual, Kastrioti, në xhiron e kaluar u befasua nga Deçani dhe synon të kthehet te fitorja. Por fitoren e synojnë edhe gjakovarët, që kanë pretendime të mëdha nga ky kampionat. Vëllaznimi llogarit edhe në përkrahjen e shikuesve për ndeshjen e dy skuadrave tradicionale. Kastrioti e Vëllaznimi kanë nga tri fitore fitore e dy humbje, përkatësisht nga gjashtë pikë, në pozitat tre e katër. Të enjten prej orës 19:30 në Podujevë takohen Llapi dhe Besa Famgasi. Shpresohet po ashtu në ndeshje të fortë. Besa është e para me 10 pikë. Ka fituar pesë ndeshjet e deritashme. Llapi renditet i pesti me katër pikë. Ndeshja mes Deçanit dhe Prishtinës është shtyrë për më vonë. Deçani është i dyti në tabelë me tetë pikë, ndërsa Prishtina renditet e gjashta me dy pikë.