Akanji dhe Vargas i bashkohen Zvicrës

Dy futbollistët e ftuar në momentin e fundit, Manuel Akanji (31) dhe Ruben Vargas (28), kanë mbërritur në grumbullimin e kombëtares zvicerane. Ndërkohë, mbrojtësi kryesor ka nisur sërish t'i kryejë detyrat e tij si zëvendëskapiten. Sipas mediumit zviceran “Blick”, pikërisht me fillimin e stërvitjes së kombëtares, të martën në mëngjes, pushoi shiu dhe në kampin stërvitor në St. Gallen u paraqitën edhe dy futbollistët e fundit nga gjithsej 28 të grumbulluar: Manuel Akanji dhe Rubén Vargas. Megjithatë, dy futbollistët e ardhur si zëvendësues nuk iu bashkuan menjëherë pjesës tjetër të skuadrës në kompleksin sportiv Gründenmoos. Ata zhvilluan stërvitje individuale, njësoj si Johan Manzambi (21), i cili ka pasur disa shqetësime fizike. Në rastin e Vargasit, problemet me stomakun dhe zorrët kishin shkaktuar vonesën e udhëtimit. Edhe pse anësori tashmë nuk kishte më simptoma, për të ishte paraparë vetëm një stërvitje e lehtë individuale. Akanji, nga ana tjetër, për arsye personale mbërriti vetëm të hënën në mbrëmje, në kohën e darkës në hotelin e kombëtares. Nuk dihet se çfarë qëndron konkretisht pas kësaj vonese. Megjithatë, trajneri Murat Yakin i kishte dhënë leje të veçantë. Por, arsyeja pse Akanji nuk u stërvit me ekipin të martën nuk kishte të bënte me këtë leje. Mbrojtësi i Interit, i cili të dielën në mbrëmje kishte festuar fitoren 2:0 ndaj Comos, mori një pushim të shkurtër për të menaxhuar ngarkesën fizike. Futbollistët e rinj duhet të këndojnë para skuadrës Megjithatë, Akanji tashmë ka nisur t'i përmbushë detyrat e tij si zëvendëskapiten i Granit Xhakës. Së bashku me Breel Embolon, ai i ka njoftuar dy futbollistët e rinj, Roggerio Nyakossi (22) dhe Samuel Ballet (25), se i pret rituali tradicional i mirëseardhjes në kombëtaren zvicerane. Të mërkurën, dy futbollistët me shumë gjasë do të duhet t'i këndojnë një këngë pjesës tjetër të skuadrës. Ndërkohë, mbrëmjen e së martës, jo vetëm Nyakossi dhe Ballet e kanë të lirë. Futbollistët mund të vendosin vetë nëse dëshirojnë të darkojnë së bashku si ekip në qytetin e St. Gallenit apo në grupe të vogla.