Arsenali në kërkim të një sulmuesi: Endrick bëhet opsioni i ri për Mikel Artetën

Arsenali po shfaq interesim konkret për të siguruar shërbimet e talentit brazilian të Real Madridit, Endrick, gjatë afatit kalimtar të janarit. Klubi londinez është vënë në lëvizje për të gjetur një përforcim në vijën e sulmit, pas problemeve fizike që ka shfaqur Bukayo Saka, duke e kthyer vëmendjen te 20-vjeçari që po kalon një periudhë sfiduese në Spanjë. Që nga fillimi i këtij sezoni, Endrick ka pasur vështirësi të gjente hapësira në formacionin e Jose Mourinhos. Pasi humbi pjesën fillestare të sezonit për shkak të një lëndimi, ai e ka pasur të pamundur të depërtojë në hierarkinë e sulmit, ku konkurrenca është e jashtëzakonshme me emra si Kylian Mbappe, Yan Diomande, Arda Guler, Vinicius Jr., Carlos Espi dhe Brahim Diaz. Deri më tani, ai ka grumbulluar vetëm 141 minuta në shtatë paraqitje, duke regjistruar një gol dhe një asistim. Megjithëse fillimisht Arsenali e kishte prioritet transferimin e Eli Junior Kroupit nga Bournemouthi, qëndrimi refuzues i klubit anglez për shitjen e francezit ka detyruar drejtuesit e “Topçinjve” të eksplorojnë alternativa të tjera. Drejtori sportiv i Arsenalit, Andrea Berta, gëzon marrëdhënie të mira me përfaqësuesit e brazilianit, të cilët e kishin propozuar lojtarin në Londër edhe në janarin e kaluar. Në anën tjetër, vetë futbollisti ka shprehur përkushtim ndaj Real Madridit, duke theksuar marrëdhënien pozitive që ka me trajnerin Jose Mourinho. “Kam shumë besim te Mourinho. Ai interesohet për mua çdo ditë, jo vetëm për futbollin, por edhe për jetën time personale. Do të jap gjithçka për Real Madridin, pasi klubi është mbi të gjithë”, ka deklaruar Endrick. Pavarësisht deklaratave të lojtarit, gazetari i njohur Matteo Moretto raporton se ekziston një mundësi prej 70 për qind që braziliani të largohet në formë huazimi në janar. Përveç interesimit nga Arsenali, për shërbimet e tij janë vënë në radhë edhe disa klube të tjera nga Premierliga dhe Serie A, duke e bërë të ardhmen e tij një nga çështjet më të ndjekura të merkatos së dimrit.