Kuqezinjtë nisin përgatitjet për Finlandën: Lajme të mira për Hoxhën dhe Shpendin

Kombëtarja shqiptare e futbollit ka zhvilluar pasditen e sotme seancën e radhës stërvitore në ambientet e “Shtëpisë së Futbollit”, duke intensifikuar përgatitjet për përballjet e ardhshme kundër Finlandës dhe Bjellorusisë. Sipas njoftimit zyrtar nga Departamenti i Komunikimit në FSHF, pjesa më e madhe e grupit ka qenë në dispozicion të plotë të trajnerit Rolando Maran, duke përballuar me sukses ngarkesën e parashikuar për këtë seancë. Një vëmendje e veçantë i është kushtuar dyshes Arbër Hoxha dhe Cristian Shpendi, të cilët kanë punuar me një program të diferencuar në fushë. Ky proces po ndiqet për të siguruar rikuperimin e tyre të plotë pas dëmtimeve të lehta që pësuan gjatë impenjimeve me klubet respektive. Megjithatë, stafi teknik është optimist dhe pret që të dy lojtarët t’i bashkohen grupit të plotë që nga dita e nesërme. Stërvitja e sotme nisi me ushtrime në palestër, për t’u pasuar më pas me punën taktike, ku trajneri Maran u përqendrua në situata të ndryshme loje. Për ditën e nesërme, programi parashikon seancën zyrtare në orën 11:00, ku 15 minutat e para do të jenë të hapura për përfaqësuesit e medias. Gjithashtu, në orën 16:00, tekniku Maran së bashku me një prej lojtarëve do të dalin në konferencën zyrtare për shtyp. Sa i përket ekipit mik, Finlanda do të zhvillojë konferencën për media në orën 11:30, ndërsa në orën 12:30 do të kryejë stërvitjen zyrtare në stadiumin “Air Albania”. Kujtojmë se sfida e vlefshme për UEFA Nations League ndërmjet Shqipërisë dhe Finlandës do të zhvillohet të enjten në orën 20:45. Interesi për këtë takim ka qenë maksimal, pasi të gjitha biletat janë shitur, duke garantuar një stadium të mbushur në kapacitetin e tij të plotë.