Limaj nga Prizreni: 16 shtatori shënoi një kthesë historike për Kosovën

Kryetari i Nismës Socialdemokrate, Fatmir Limaj, ka zhvilluar një takim me strukturat drejtuese, aktivistët dhe bashkëpunëtorët e tij në qytetin e Prizrenit. Ky takim u organizua në kuadër të një cikli diskutimesh të fokusuara në temën “Kosova pas aktgjykimit të 16 shtatorit”. Gjatë këtij bashkëbisedimi, Limaj ka shtjelluar zhvillimet aktuale politike, duke u ndalur veçanërisht te pasojat e vendimeve të fundit nga Haga. Pjesë e diskutimit ishin edhe mbrojtja e vlerave të luftës së Ushtrisë Çlirimtare të Kosovës, rishikimi i Ligjit për Dhomat e Specializuara, si dhe sfidat e rënda ekonomike e sociale me të cilat po përballet vendi. Sipas kreut të Nismës, impakti i këtij aktgjykimi tejkalon fatin e individëve që po mbahen në Hagë, duke prekur drejtpërdrejt dinjitetin e luftës për liri dhe themelet mbi të cilat është ngritur shteti i Kosovës. “Kosova nuk është më e njëjta pas 16 shtatorit. Vendi nuk e ka luksin të qëndrojë indiferent apo të humbasë në kalkulime të ngushta politike përballë çështjeve që cenojnë interesin shtetëror”, ka deklaruar Limaj. Në fjalën e tij, ai nënvizoi se qytetarët e vendit kërkojnë sot qartësi, qëndrime parimore dhe llogaridhënie institucionale. Limaj e mbylli fjalën e tij me një thirrje për veprim, duke theksuar se Kosova ka nevojë urgjente për përgjegjësi, vendosmëri dhe hapa konkretë përpara.