Britania, Serbisë: Nxirri para drejtësisë autorët e sulmeve ndaj KFOR-it dhe në Banjskë

Ambasadori i Britanisë së Madhe në OSBE, Neil Holland ka pritur Shefin e Misionit të OSBE-së në Kosovë, Gerard McGurk, në Këshillin e Përhershëm të OSBE-së. Holland në fjalën e tij tha se Mbretëria e Bashkuar i bën thirrje Serbisë që t’i nxjerrë para drejtësisë të gjithë personat që janë përgjegjës për sulmet e majit të vitit 2023 ndaj trupave të KFOR-it dhe ata të agresionit në Banjskë. “Ne vazhdojmë të bëjmë thirrje që Serbia të bashkëpunojë plotësisht me përpjekjet për të nxjerrë para drejtësisë ata që janë përgjegjës për sulmet e vitit 2023 ndaj trupave të KFOR-it dhe në Banjskë, dhe të përmbushë zotimin e saj për të bashkëpunuar në hetimin e sulmit në Kanalin e Ibër-Lepencit”, thuhet në deklaratë, transmeton Klankosova.tv. Tutje, Mbretëria e Bashkuar tha se është e shqetësuar për natyrën e pakoordinuar të mbylljeve të institucioneve dhe objekteve serbe në veri të Kosovës, të cilat sipas tyre, ofrojnë shërbime jetike për qytetarët serbë të Kosovës dhe komunitetet e tjera jo-shumicë. “Ne i bëjmë thirrje Kosovës dhe Serbisë të angazhohen në mënyrë konstruktive në dialogun e lehtësuar nga BE-ja dhe të përmbushin detyrimet e tyre përkatëse, përfshirë krijimin e Asociacionit të Komunave me Shumicë Serbe”, u tha tutje në deklaratë.