Lamine Yamal nuk ka rival në Evropë, ylli i Barcelonës thyen rekorde të jashtëzakonshme

Fjalët lavdëruese duket se nuk mjaftojnë më për të përshkruar lojën, cilësinë dhe kontributin e jashtëzakonshëm të Lamine Yamalit. 19-vjeçari aktualisht ndodhet në Barcelonë, ku po pushon, ndërsa pas disa ditësh do t’i bashkohet Kombëtares së Spanjës për ndeshjen e së dielës kundër Anglisë. Megjithatë, ajo që e bën edhe më të veçantë Yamalin është se ai nuk është vetëm një golashënues, por edhe një prej futbollistëve më bujarë në lojë. Në fakt, asnjë lojtar në pesë ligat më të forta evropiane nuk ka regjistruar më shumë asistime se ai këtë sezon. Yamal kryeson renditjen e asistuesve në La Liga me tetë pasime vendimtare. Pas tij renditen Javi Hernández i Espanyolit me gjashtë asistime dhe bashkëlojtari i tij te Barcelona, Fermín López, me pesë. Talenti i katalunasve ka asistuar për Joao Cancelon dhe Gabriel Jesusin në ndeshjen kundër Racing Santanderit, për Raphinhan në fitoren ndaj Sevillas, për Jules Kounden kundër Getafes, si dhe sërish për Gabriel Jesusin në La Cartuja. Ndërkohë, Fermín López ka përfituar nga asistimet e tij në ndeshjet kundër Alavésit dhe Atletico Madridit. Që nga asistimi i parë kundër Racing Santanderit, Yamal ka dhënë pasim vendimtar në gjashtë nga shtatë ndeshjet e fundit të Barcelonës në kampionat. Dominimi i tij nuk kufizohet vetëm në Spanjë. Në Ligën Premier, futbollisti me më shumë asistime është gjermani Pascal Groß i Brightonit, me gjashtë. Në Bundesligë, Marco Grüll i Werder Bremenit ka tetë, në Serie A Juan Miranda i Bolognas ka gjashtë, ndërsa në Ligue 1 Florian Thauvin i Lensit numëron po ashtu tetë asistime. Kështu, Yamal është në mesin e lojtarëve me më shumë asistime në secilën prej pesë ligave kryesore evropiane, ndërsa askush nuk e ka tejkaluar në total. Kontributi i tij është edhe më i madh në Ligën e Kampionëve, ku ka regjistruar katër asistime, dy kundër Feyenoordit dhe dy të tjera ndaj Galatasarayt. Në total, Yamal ka arritur në 12 asistime në të gjitha garat këtë sezon, shifër që nuk e ka arritur asnjë futbollist tjetër në pesë ligat kryesore evropiane dhe garat përkatëse. Për më tepër, talenti spanjoll ka realizuar edhe 13 gola, dhjetë në La Liga dhe tre në Ligën e Kampionëve. Sipas statistikave të publikuara nga MisterChip, Yamal tashmë ka arritur në kuotën e 40 asistimeve në La Liga, në moshën 19-vjeçare e 118-ditëshe. Ai është bërë futbollisti i parë në historinë e kampionatit spanjoll që arrin këtë shifër para se të mbushë 22 vjet.