Tragjedi në Greqi: Ndërron jetë 16-vjeçari shqiptar pas dëmtimit fatal në kokë gjatë ndeshjes

Një ngjarje e rëndë ka tronditur opinionin publik, pasi futbollisti i ri shqiptar, Asllan Gjana, 16 vjeç, ka ndërruar jetë në spital pas një aksidenti tragjik në fushën e blertë. Sipas informacioneve të bëra publike në rrjetet sociale, i riu kishte pësuar lëndime kritike në kokë gjatë një takimi futbollistik të zhvilluar të dielën e kaluar në ishullin e Thassos. Aksidenti i rëndë ndodhi gjatë ndeshjes së divizionit të dytë të Shoqatës Greke të Futbollit mes skuadrës së tij Byronas Kavala dhe kundërshtarëve të Aiandas Panagias. Vetëm në minutën e dytë të lojës, ndërsa po vraponte për të kapur topin, 16-vjeçari ka dalë jashtë vijave kufizuese të fushës dhe është përplasur fort me pjesën e pasme të kokës në rrethimin metalik, duke rënë menjëherë pa ndjenja. Menjëherë pas incidentit, sfida u ndërpre dhe mjeku i pranishëm në fushë i dha ndihmën e parë mjekësore, përpara se autoambulanca të mbërrinte në vendngjarje dhe ta transportonte me urgjencë drejt spitalit për shkak të gjendjes tejet të rëndë. Adoleshenti u shtrua urgjentisht në repartin e kujdesit intensiv të Spitalit të Kavalës, ku mjekët e cilësuan që në fillim gjendjen e tij si tejet kritike për jetën. Fatkeqësisht, pavarësisht përpjekjeve të stafit mjekësor, Asllan Gjana nuk ka mundur t'u mbijetojë plagëve të marra, duke u ndarë nga jeta. Vdekja e parakohshme e tij u bë e ditur mëngjesin e sotëm, përmes një njoftimi prekës dhe lamtumirës nga klubi i Kavalës për lojtarin e tyre të ri. "Me dhimbje të padurueshme dhe trishtim të papërshkrueshëm, familja atletike e Byron Kavalës i jep lamtumirën njërit prej fëmijëve të saj, futbollistes së Byron II, Gjana Asllanit, Anit tonë, e cila u nda nga jeta kaq padrejtësisht dhe para kohe. Në këto kohë të vështira, shprehim ngushëllimet tona të sinqerta familjes dhe të dashurve të tij dhe bashkohemi në zinë e tyre. I sigurojmë ata se nuk do të jenë vetëm në këtë përvojë tragjike. Bajroni i Kavallës është në zi, humbi një nga fëmijët e tij. Udhëtim të mbarë, djali ynë, ti do të jetosh përgjithmonë në zemrat tona. Administrata, trajnerët, lojtarët dhe e gjithë familja juaj atletike te Byronas Kavala,” thuhet në mesazhin ngushëllues të klubit.