Kurti: Rritja e pranisë së Ushtrisë së Serbisë në kufi, reaksion ndaj “Defender Europe 25”

Kryeministri në detyrë, Albin Kurti, ka thënë se Serbia ka rritur praninë e forcave të saj ushtarake pranë kufirit me Kosovën. Në hapjen e mbledhjes së Qeverisë, të enjten, Kurti ka shprehur bindjen se një veprim i tillë i Serbisë ka ndodhur, pasi që Kosova është zgjedhur që të jetë vend nikoqir i zhvillimit të ushtrimit ushtarak të Shteteve të Bashkuara të Amerikës (SHBA), “Defender Europe 25”. “E rritja e gatishmërisë dhe pranisë në kufirin tonë e Forcave të Armatosura të Serbisë, besojmë që është reaksion ndaj ‘Defender Europe 25’, por ajo çfarë nuk e dimë ende është se a po e bën këtë vetë Serbia apo një gjë të tillë ia ka kërkuar Rusia”, ka theksuar ai. Një ditë më parë, ministri në detyrë i Mbrojtjes, Ejup Maqedonci, ka thënë se, afër kufirit të Kosovës me Serbinë, janë të vendosura 3 nga katër brigadat e kombinuara të ushtrisë serbe. Sipas tij, brigadat janë të vendosura në Rashkë, në Nish dhe në Vranjë, derisa pranë vijës kufitare me Kosovën, në distancë prej 300 metrash deri në 5 kilometra, janë të vendosura edhe 28 baza operacionale si edhe 20 baza të xhandarmërisë së Serbisë. Zhvillimin e stërvitjeve ushtarake “Defender Europe 25” e ka ndjekur nga afër presidentja Vjosa Osmani. Ajo ka bërë të ditur se duke qenë nikoqire e stërvitjeve, Kosova ka përçuar një mesazh të qartë se jo vetëm që kontribuon, por edhe është e gatshme që të jetë pjesë e Aleancës Veriatlantike të NATO-s. “Vetëm dy ditë më parë, në SHBA, diskutuam për vizionin e përbashkët për mbrojtjen e Evropës. Sot, ky vizion po zbatohet në terren, në tokën tonë, përmes Defender Europe ’25 – një ushtrim i përmasave të jashtëzakonshme që dëshmon përkushtimin ndaj paqes dhe sigurisë. Rreth 1000 pjesëtarë të FSK-së janë të angazhuar drejtpërdrejt – profesionistë të barabartë me aleatët nga vendet më të fuqishme të botës. Ky është një mesazh i qartë: Kosova jo vetëm që kontribuon, por është e gatshme të jetë pjesë e NATO-s”, ka shkruar Osmani në Facebook. Krahas për ushtrimin ushtarak, në mbledhjen e së enjtes të ekzekutivit, anëtarët e kabinetit qeveritar kanë marrë edhe vendim për emërimin e udhëheqësve në disa institucione, përfshirë atë të Agjencisë për Arsim, të Inspektoratit për Arsim, të Agjencisë së Meteorologjisë e edhe të Inspektoratit Qendror të Shëndetësisë. Këto veprime të ekzekutivit, kryeministri në detyrë Albin Kurti, i ka justifikuar duke thënë se emërimet dhe formimet për përmbylljen e proceseve rekrutuese, janë nisma të ndërmarra më herët. “Me këtë rast, me këto vendime nuk po e fillojmë nismën e proceseve të reja, por vetëm po i përmbyllim ato që i kemi nisur e janë zhvilluar gjatë mandatit të plotë e të rregullt tonë. Ky nuk është vetëm obligim i yni, por është edhe përgjegjësi ligjore dhe institucionale, për t’i plotësuar pritshmëritë e atyre që i kanë besuar shtetit e i janë shtruar mundësisë, të jenë pjesë e administratës publike”, ka theksuar ai. Qeveria në detyrë, të enjten, ka ndarë edhe 20.721 euro për mbulimin e kontributit vjetor të Qeverisë në Qendrën Rajonale të Nismës për Migrim, Azil e Refugjatë. Është formuar, gjithashtu, edhe komisioni i ankesave për shtetësi, si dhe janë shpronësuar disa prona në komunën e Pejës.