Lindsey Vonn i nënshtrohet operacionit të nëntë: Ky do të jetë operacioni im i nëntë

Legjenda amerikane e skijimit, Lindsey Vonn, i është nënshtruar operacionit të nëntë në SHBA, pas lëndimeve të rënda në këmbën e majtë, të cilat i pësoi pas rrëzimit në Lojërat Olimpike të shkurtit në Itali. 42-vjeçarja kishte pranuar para ndërhyrjes kirurgjikale se ishte mjaft nervoze, por njëkohësisht shpresonte që kjo të ishte vizita e saj e fundit në sallën e operacionit. “Ky do të jetë operacioni im i nëntë. Po e regjistroj këtë video para ndërhyrjes, sepse, të them të drejtën, jam mjaft nervoze”, -shkruan Vonn në Instagram. Para ndërhyrjes, amerikania shpjegoi se mjekët do t'i hiqnin pllakat metalike dhe vidat nga këmba e majtë, si dhe do t'i rindërtonin ligamentin e kryqëzuar të përparmë. Për shkak të dëmtimeve të shumta dhe materialeve metalike të vendosura në këmbë, deri më tani nuk kishte qenë e mundur të kryhej ndërhyrja në ligament. Vonn kishte pritur nëntë muaj për këtë operacion, në mënyrë që kocka të kishte kohë të shërohej. Sipas saj, kocka tashmë është shëruar, por pas heqjes së vidave duhet të shërohen edhe vrimat e mbetura në të.Amerikania pret që rikuperimi të zgjasë nga gjashtë deri në nëntë muaj. Ajo paralajmëroi se gjatë operacionit mund të ketë edhe ndryshime të tjera, prandaj do t'i informojë ndjekësit për ecurinë e rikuperimit. Para ndërhyrjes, Vonn shprehu optimizëm dhe falënderoi miqtë dhe familjen për mbështetjen. Pjesëmarrja në gara mbetet e pasigurt Fituesja e katërfishtë e Kupës së Botës në klasifikimin e përgjithshëm kishte këputur ligamentin e kryqëzuar të përparmë më 30 janar, gjatë një gare të Kupës së Botës në Crans-Montana. Pavarësisht lëndimit, ajo mori pjesë në garën olimpike të lëshimit në Cortina d'Ampezzo, ku më 8 shkurt pësoi një rrëzim të rëndë dhe theu në mënyrë të komplikuar tibian e këmbës së majtë. Për shkak të lëndimeve të rënda, iu desh t'i nënshtrohej tetë operacioneve të mëparshme, ndërsa të hënën kreu ndërhyrjen e nëntë. Vonn ka theksuar disa herë se dëshiron të rikthehet në ski, por ende nuk ka vendosur nëse do të rikthehet edhe në garat zyrtare. Federata Amerikane e Skijimit, U.S. Ski & Snowboard, e përfshiu më 7 tetor në listën e 49 anëtarëve të përfaqësueses për sezonin 2026/27. Vonn bën pjesë në ekipin A të femrave, por kjo nuk garanton se do të marrë pjesë në garat e sezonit të ardhshëm. Gjatë karrierës së saj, ajo ka regjistruar 84 fitore në Kupën e Botës, duke u renditur në vendin e tretë në listën e të gjitha kohërave. Para saj janë vetëm suedezi Ingemar Stenmark, me 86 fitore, dhe amerikania Mikaela Shiffrin, me 110 triumfe.Me rekordet prej 45 fitoresh në disiplinën e lëshimit dhe 28 në super-G, Lindsey Vonn mbetet skiatorja më e suksesshme në historinë e Kupës së Botës për femra në këto dy disiplina të shpejtësisë.