Protesta simbolike para Qeverisë: Fotografia e ministrit Sveçla me mesazhin viral “A e njeh Ukin?”

Aktivistët e lëvizjes “Revolta” kanë ndërmarrë një aksion simbolik para ndërtesës së Qeverisë së Kosovës, duke vendosur një fotografi të ministrit të Punëve të Brendshme, Xhelal Sveçla, të shoqëruar me mbishkrimin tashmë viral “A e njeh Ukin?”. Ky veprim vjen si reagim ndaj neglizhencës së pretenduar të institucioneve të sigurisë në rastin tragjik të vrasjes së Arlinda Zekajt. Në valën e reagimeve të shumta qytetare, kërkesa për dorëheqjen e ministrit Sveçla është bërë gjithnjë e më e zëshme, për shkak të dështimeve të raportuara në sistemin e sigurisë. Ndërkohë, si pasojë e presionit publik dhe zhvillimeve pas këtij rasti, Policia e Kosovës ka ndërmarrë ndryshime të konsiderueshme në strukturat e saj drejtuese, ndërsa drejtori i Përgjithshëm, Gazmend Hoxha, ofroi dorëheqjen e tij morale. Përkundër këtyre ndryshimeve brenda strukturave policore, ministri Xhelal Sveçla ka vazhduar ushtrimin e detyrës së tij pa dhënë dorëheqje. Kjo situatë ka nxitur revoltën e aktivistëve, të cilët përmes mesazhit “A e njeh Ukin?” – shprehje kjo që është bërë tejet popullore pas përdorimit në një diskutim në BBVK – kanë ironizuar qëndrimin e ministrit ndaj kërkesave për përgjegjësi institucionale.