Ardian Gjini shënjestron ekzekutivin: Importi i qumështit shënon rritje prej 1 milion litrash në muaj

Kryetari i Aleancës, Ardian Gjini, ka drejtuar kritika të ashpra në drejtim të Qeverisë së udhëhequr nga kryeministri Albin Kurti, duke u fokusuar te trajtimi që po u bëhet prodhuesve vendorë. Gjatë një paraqitjeje televizive në emisionin “Rubikon”, ai vlerësoi se politikat dhe qasja e deritanishme e ekzekutivit po dëmtojnë rëndë zinxhirin e prodhimit në vend. Gjatë diskutimit, Gjini bëri me dije se tregu kosovar po përballet me një shtesë prej një milion litrash në muaj sa i përket qumështit të importuar, krahasuar me intervalin e njëjtë kohor të vitit të kaluar. Sipas tij, kjo situatë alarmante është pasojë e drejtpërdrejtë e goditjeve që i janë bërë bizneseve vendase të këtij sektori. “Për 1 milion litra në muaj është rritë importi i qumështit. Janë tu u importu ma shumë se në periudhën e njëjtë të vitit të kaluar. Pse ndodh kjo? Për shkak se i ka goditë rëndë prodhuesit vendorë të qumështit. Ka dalë nja 20 herë në konferencë për shtyp për ato tema njëri prej ministrave,” u shpreh Gjini. Sipas zyrtarit të lartë të Aleancës, zvogëlimi i prodhimit vendas dhe dyndja e produkteve të huaja nuk dëmtojnë vetëm korporatat përpunuese, por lënë pasoja direkte te blegtorët dhe fermerët e thjeshtë në terren, të cilët janë shtylla kryesore e këtij aktiviteti ekonomik. “Ato 1 milion litra që i prodhojnë blegtorët tonë, fermerët tonë… se kompanitë tona prej fermerëve e marrin qumështin. Çka po shkojmë një hap më andej në zinxhir? 1 milion litra më pak kanë me i shitë këtë kohë prodhuesit tonë, blegtorët tonë. Tash, qysh mundet me na ndodh neve si shtet që duhet me u goditë dikush i selektuar?”, shtoi ndër të tjera ai.