Vlerësim historik në Britani: Granit Xhaka shpallet lojtari më i mirë i të gjitha kohërave me numrin 34

Një nga gazetat më prestigjioze britanike ka ndërmarrë një nismë unike për të zgjedhur futbollistin më të mirë në histori për çdo numër fanelle, nga 1 deri në 50, ku një vend të veçantë ka siguruar edhe ylli shqiptar, Granit Xhaka. Kapiteni i Përfaqësueses së Zvicrës është kurorëzuar zyrtarisht si lojtari më i shquar që ka mbajtur ndonjëherë veshur fanellën me numrin 34. Sipas prestigjiozes britanike, gara për këtë numër u zhvillua ngushtë mes mesfushorit holandez Nigel de Jong dhe Granit Xhakës. De Jong kishte një karrierë mbresëlënëse me këtë numër, duke e mbajtur për pesë sezone te Manchester City, katër te Milani, një te LA Galaxy dhe një te Galatasaray. Megjithatë, kjo nuk mjaftoi për të mposhtur Xhakën, i cili e ka bartur fanellën 34 për tri sezone te Baseli, katër te Borussia Mönchengladbachu, pesë nga shtatë sezone te Arsenali, dy te Bayer Leverkuseni, si dhe gjatë gjithë periudhës së tij aktuale te Sunderland. Faktori vendimtar për këtë triumf ishte lidhja sentimentale dhe origjina e zgjedhjes: Xhaka e kishte përzgjedhur numrin 34 që në hapat e parë të karrierës, pasi ky ishte numri i autobusit me të cilin udhëtonte rregullisht drejt seancave stërvitore gjatë kohës kur luante për grupmoshat e reja të Baselit. Në të njëjtën listë, gazeta ka veçuar edhe legjenda të tjera botërore, si Diego Armando Maradona (1960–2020), i cili u shpall lojtari më i mirë që ka bartur fanellën legjendare me numrin 10. Kjo përzgjedhje madhështore është bazuar në disa kritere kyçe: kohëzgjatja e mbajtjes së numrit, arsyeja e përzgjedhjes në fillim të karrierës, trofetë e fituara, si dhe rëndësia e trashëgimisë së lënë pas, veçanërisht pas ndarjes nga jeta të futbollistëve. Nisma ka rezervuar edhe surpriza të mëdha, si në rastin e numrit 5. Për këtë numër, Zinedine Zidane pati një periudhë të suksesshme pesëvjeçare te Real Madridi, duke fituar Ligën e Kampionëve dhe titullin spanjoll, ndërsa më pas u pasua nga Fabio Cannavaro që fitoi dy tituj kampionë në tri vite. Pavarësisht kësaj, mediumi britanik vendosi t'ia jepte këtë epitet të madh gjermanit Franz Beckenbauer (1945–2024). Simboli i famshëm i rolit të libero-s shkëlqeu gjatë viteve 1960 dhe 1970 te Bayern Munich dhe Kombëtarja e Gjermanisë. “Ai dukej sikur ishte krijuar posaçërisht për të ecur nëpër fushën e futbollit me numrin 5 në shpinë, ndërsa në sfond dëgjohej një melodi imagjinare, e butë e xhazit me saksofon”, shkruan ndër të tjera gazeta, duke kujtuar se pas vdekjes së Beckenbauerit në vitin 2024, Bayern Munich nuk e ka tërhequr nga përdorimi numrin e tij.