Deputeti Ramadani e quan provokim të rëndë vizitën e Listës Studentore të Serbisë dhe kërkon llogaridhënie institucionale

Deputeti i Aleancës, Burim Ramadani, e ka cilësuar si një provokim të rëndë praninë e përfaqësuesve të Listës Studentore të Serbisë brenda territorit të Kosovës, duke kërkuar sqarime urgjente nga organet kompetente lidhur me rrethanat e hyrjes së tyre. Sipas Ramadanit, autoritetet e Kosovës nuk duhet të lejojnë asnjë politikan nga Serbia që të hyjë në vend me qëllim nxitjen e tensioneve apo fyerjen e institucioneve shtetërore. “Provokim i rëndë i serbëve nga Serbia, duhet të qartësohet si hynë në Kosovë”, ka shkruar ai në reagimin e tij. Ai ka theksuar se pavarësisht mbulesës apo përkatësisë politike të vizitorëve, nevoja për kontroll të rreptë dhe përgjegjësi institucionale mbetet e pandryshueshme. “Pavarësisht nëse janë nga Lista e Studentëve, e Vuçiqit, Daçiqit, Vulinit apo dreqit e të birit, politikanët e Serbisë nuk guxon të lejohen të futen në Kosovë për të nxitur e provokuar, fyer e ofenduar shtetin e Kosovës”, ka deklaruar Ramadani. Në këtë kuadër, ai ka vlerësuar pozitivisht nismën e Komisionit parlamentar për Çështje të Sigurisë dhe Mbrojtjes për të kërkuar raportim me shkrim nga ministri i Punëve të Brendshme rreth kësaj çështjeje. “Është mirë që sot Komisioni Parlamentar për Siguri vendosi t’i kërkojë informatë me shkrim Ministrit të Punëve të Brendshme rreth kësaj. Si anëtar i këtij Komisioni, besoj që saktësia në këtë informim duhet të jetë e plotë”, ka theksuar ai, duke shtuar se transparenca dhe llogaridhënia e Qeverisë janë absolutisht të domosdoshme. Çështja e vizitës së Listës Studentore të Serbisë u trajtua gjerësisht gjatë mbledhjes së sotme të Komisionit për Çështje të Sigurisë dhe Mbrojtjes, ku u ngritën dilema të hapura nëse delegacioni kishte siguruar lejen e duhur nga institucionet e Kosovës për të hyrë në vend.