Lajm i mirë për tifozët: Lirohen biletat e sektorit izraelit për ndeshjen e Kosovës

Federata e Futbollit e Kosovës (FFK) ka njoftuar se vazhdon procesi i shitjes së biletave për sfidën e ardhshme të Kombëtares së Kosovës kundër Izraelit, e cila zhvillohet në kuadër të Ligës së Kombeve. Nëpërmjet një komunikate zyrtare, shtëpia e futbollit kosovar ka bërë të ditur se sektori i stadiumit që ishte parashikuar fillimisht për mbështetësit izraelitë është liruar tashmë. Si rrjedhojë, ky hapësirë është në dispozicion të tifozëve vendas që dëshirojnë të jenë të pranishëm në stadium. Ky vendim ka ardhur pas konfirmimit zyrtar nga ana e Federatës së Futbollit të Izraelit se tifozët e tyre nuk do të udhëtojnë drejt Prishtinës për ta ndjekur nga afër këtë përballje. Sipas njoftimit të FFK-së, riorganizimi i sektorëve është bërë në përputhje të plotë me rregulloret e UEFA-s. Të gjithë të interesuarit mund t’i sigurojnë biletat e tyre përmes platformës zyrtare: https://eu.ebileta.al/biglietteria/listaEventiPub.do. Federata ka ftuar tifozët e "Dardanëve" që ta shfrytëzojnë këtë mundësi për të mbushur shkallët e stadiumit dhe për t’i dhënë përkrahjen e duhur Kombëtares në këtë sfidë vendimtare.