Tronditje te Pogradeci, Emiljano Çela jep dorëheqjen nga stoli i skuadrës

Klubi i futbollit Pogradeci ka mbetur pa trajner, pasi Emiljano Çela ka vendosur të tërhiqet përfundimisht nga drejtimi i skuadrës liqenore, një vendim që është pranuar menjëherë nga strukturat drejtuese të klubit. Edhe pse skuadra arriti të triumfojë në sfidën e fundit kundër Besëlidhjes, ecuria pas 10 javëve të para të kampionatit nuk ka përmbushur pritshmëritë e larta të vendosura para fillimit të sezonit. Çela kishte marrë drejtimin e Pogradecit sezonin e kaluar, ku pavarësisht investimeve të konsiderueshme, nuk mundi ta siguronte ngjitjen në elitën e futbollit shqiptar. Aktualisht, ekipi pozicionohet në vendin e pestë të Kategorisë së Parë, duke numëruar 17 pikë në total. Nëpërmjet një njoftimi zyrtar, klubi liqenor ka konfirmuar largimin e trajnerit: “Klubi i Futbollit Pogradeci njofto se trajneri Emiljano Çela ka dhënë dorëheqjen nga drejtimi i ekipit të parë. Klubi e ka pranuar dorëheqjen e tij dhe z. Çela largohet nga skuadra”. “Drejtuesit e klubit e falënderojnë për punën dhe përkushtimin gjatë kohës që drejtoi skuadrën dhe i urojnë suksese në vazhdim të karrierës,” shtohet më tej në komunikatën zyrtare. Ndërkohë, drejtuesit kanë nisur punën intensive për identifikimin dhe emërimin e pasardhësit të tij në krye të stolit, ndërsa emri i teknikut të ri do të zyrtarizohet sapo të mbyllen bisedimet. Përderisa ky proces të finalizohet, seancat stërvitore dhe përgatitjet e ekipit do të vijojnë normalisht.