Zikaltrit nisin aksionin për kontratat: Calhanoglu kërkon rinovimin, flasin drejtuesit

Klubi i Interit ka ndërmarrë hapa konkretë për të garantuar stabilitetin afatgjatë të grupit, duke nisur punën intensive për zgjatjen e kontratave të shtyllave kryesore të skuadrës. Drejtuesit e lartë të klubit nga Milano, të udhëhequr nga Giuseppe Marotta dhe Dario Baccin, janë përqendruar te rinovimet e marrëveshjeve për Hakan Calhanoglu, Marcus Thuram, Federico Dimarco dhe Carlos Augusto. Dosja më e nxehtë në tavolinë mbetet ajo e mesfushorit turk Hakan Calhanoglu, aktualisht i lidhur me klubin deri në qershor të vitit 2027. Futbollisti ka shprehur qartë dëshirën e tij për të vijuar karrierën në kryeqytetin e modës dhe ka kërkuar një shtesë dyvjeçare në kontratë. Palët kanë nisur tashmë bisedimet paraprake, me synimin e qartë për të mbyllur marrëveshjen zyrtare brenda muajve të fundit të këtij viti. Ndërkohë, sa i përket mbrojtësit të majtë Federico Dimarco, drejtuesit kanë aktivizuar paraprakisht klauzolën e zgjatjes për një tjetër edicion, duke e shtrirë bashkëpunimin deri në vitin 2028. Megjithatë, ambicia e klubit është që ta lidhë edhe më gjatë italianin me fanellën zikaltër, duke marrë parasysh edhe vullnetin e vetë lojtarit për të mos lëvizur nga Milano. Në axhendën e drejtuesve bën pjesë gjithashtu sulmuesi francez Marcus Thuram. Edhe pse ai ka një kontratë ekzistuese që skadon në vitin 2028, kontaktet e para mes palëve kanë nisur tashmë, me qëllim që francezi të mbahet i lidhur me projektin zikaltër për një periudhë sa më të gjatë kohore. Paralelisht me këto çështje, strukturat drejtuese të klubit milanez po finalizojnë detajet edhe për zgjatjen e kontratës së mbrojtësit Carlos Augusto, bisedimet me të cilin po evulohen me ritme të shpejta drejt fazës përfundimtare.