Ndryshime në krye të Portit të Durrësit: Andrea Shllaku merr zyrtarisht drejtimin e institucionit

Autoriteti Portual i Durrësit ka nisur një kapitull të ri, teksa Andrea Shllaku është emëruar zyrtarisht në postin e Drejtorit të Përgjithshëm Ekzekutiv. Ceremonia e prezantimit u zhvillua gjatë ditës së sotme në prani të stafit drejtues dhe punonjësve të këtij institucioni. Prezantimi i drejtuesit të ri u krye nga zëvendësministri i Infrastrukturës dhe Energjisë, Hantin Bonati, së bashku me Sekretarin e Përgjithshëm të kësaj ministrie, Besian Kadiu. Gjatë këtij takimi, u theksua rëndësia e këtij pozicioni dhe pritshmëritë për vijimin e punës në këtë nyje strategjike të transportit detar. Sipas njoftimit zyrtar të Autoritetit Portual, Shllaku vjen në këtë detyrë me një bagazh të pasur profesional, duke ndërthurur përvojën e gjatë në administratën publike me ekspertizën specifike në sektorin portual. Përpara këtij emërimi, ai ka ushtruar funksione të rëndësishme, si atë të zëvendësministrit të Mbrojtjes, si dhe detyra të tjera kyçe brenda Autoritetit Portual të Durrësit, ku ka shërbyer si Drejtor i Divizionit Operacional dhe zëvendësdrejtor i përgjithshëm. Andrea Shllaku merr këtë përgjegjësi të re pas dorëheqjes së mbajtësit të mëparshëm të këtij posti, Liburn Aliu, i cili u largua nga detyra duke i hapur rrugë procesit të riorganizimit në krye të institucionit.