Tragjedi në Bullgari: Mjegulla e dendur shkakton përplasjen e rreth 50 automjeteve, 10 të vdekur dhe dhjetëra të plagosur

Një aksident masiv rrugor ka tronditur Bullgarinë juglindore, pasi dhjetëra automjete janë përplasur në të dyja kahet e një autostrade, si pasojë e kushteve të rënda atmosferike dhe mjegullës së dendur. Bilanci paraprak flet për të paktën 10 viktima. Në vendin e ngjarjes kanë mbërritur menjëherë forcat e policisë, ekipet e zjarrfikësve dhe autoambulancat. Pamjet e transmetuara nga vendngjarja dëshmojnë një skenë apokaliptike me makina dhe kamionë të grumbulluar e të shkatërruar, ndërsa shumë prej tyre kanë përfunduar të përmbysur apo të dalë jashtë rrugës. Guvernatori rajonal i Jambolit, Georgi Chalakov, ka konfirmuar se numri i viktimave ka arritur në 10, ndërsa në këtë përplasje zinxhir janë përfshirë përafërsisht 50 automjete. Ndërkohë, kryeinspektori Todor Mishinev nga Drejtoria Rajonale e Jambolit, në kuadër të Ministrisë së Punëve të Brendshme, ka bërë të ditur për televizionin lokal Nova TV se disa persona vijojnë të mbeten të bllokuar brenda automjeteve të tyre. “Tani për tani, përparësia jonë absolute mbeten operacionet e shpëtimit. Sapo ato të përfundojnë, do të nisim menjëherë veprimet procedurale dhe hetimore për të zbardhur shkaqet e plota,” u shpreh ai. Si pasojë e këtij aksidenti masiv, rreth 27 persona kanë pësuar lëndime dhe janë dërguar me urgjencë në spitalet rajonale për të marrë trajtimin e nevojshëm mjekësor.