Lavrov: Pakti energjetik me SHBA-në solli stabilitet dhe u ulën çmimet globale

Kryediplomati rus, Sergej Lavrov, ka deklaruar të martën se mirëkuptimi i arritur mes Moskës dhe Uashingtonit për lehtësimin e sanksioneve mbi shitjen e karburanteve ruse përbën një gur thelbësor për stabilitetin e tregut global të energjisë. Sipas tij, ndryshe nga kundërshtarët e saj, Rusia nuk i shfrytëzon lidhjet ekonomike për qëllime gjeopolitike apo për të dëmtuar rivalët, duke rikujtuar se vendi i jo ka furnizuar evropianët me lëndë djegëse në vlerë prej 320 miliardë dollarësh. “Një kontribut i rëndësishëm për sigurinë energjetike ishte marrëveshja e arritur midis udhëheqësve të Rusisë dhe Shteteve të Bashkuara për të pezulluar kufizimet në eksportin e karburantit rus dizel”, u shpreh Lavrov gjatë fjalës së tij. Ministri shtoi se hapat për zbatimin e kësaj marrëveshjeje kanë nisur tashmë, duke sjellë një ulje të menjëhershme të çmimeve në tregje, ndërsa rikonfirmoi angazhimin e Moskës për të garantuar një furnizim të sigurt dhe të ekuilibruar. Kjo marrëveshje vjen pas një komunikimi telefonik që muajin e kaluar pati Presidenti i SHBA-së Donald Trump me homologun e tij rus Vladimir Putin, ku u dakordësua që Moska të dërgojë menjëherë mbi 300,000 ton naftë në tregun amerikan dhe atë ndërkombëtar. Kreu i Shtëpisë së Bardhë bëri të ditur gjithashtu se Rusia do të nisë dërgimin e 500,000 tonëve shtesë gjatë muajit nëntor, të ndjekura nga 1 milion ton të tjera menjëherë pas kësaj periudhe. Më tej, Trump theksoi se brenda një afati të shkurtër kohor mund të sigurohen edhe 3 milionë tonë shtesë, në varësi të gjendjes dhe kapaciteteve të rafinerive ruse të naftës. Derisa Putin vlerësoi se këto dërgesa do t'i shërbejnë ekonomisë botërore, nga ana tjetër, Presidenti i Ukrainës, Volodymyr Zelenskyy, e ka kundërshtuar ashpër këtë pakt, duke paralajmëruar se zbutja e kufizimeve mund të ndihmojë në financimin e ushtrisë ruse. Nga ana e tij, Lavrov theksoi se një sistem i qëndrueshëm energjetik është i pazëvendësueshëm për rritjen ekonomike, duke fajësuar sanksionet e Perëndimit dhe sekuestrimin e cisternave të huaja për trazirat në tregun e karburanteve. Ai gjithashtu akuzoi Kievin për sulme të vazhdueshme ndaj infrastrukturës jetike në Rusi dhe territore të tjera, duke u shprehur se këto veprime kanë kaluar pa u vënë re, pavarësisht thirrjeve të Presidentit Trump për ndalimin e tyre. Bllokimin e Ngushticës së Hormuzit, Lavrov e cilësoi si një tjetër faktor tejet destabilizues për sektorin energjetik global. “Pretendimet e NATO-s, BE-së dhe shteteve të tyre anëtare për të diktuar kushtet në zona të ndryshme detare janë tërësisht të papranueshme”, përfundoi ai.