LSDM alarmon: Rritja e çmimeve dhe inflacioni po shkatërrojnë standardin e qytetarëve

Vala e re e shtrenjtimeve ka vënë sërish në alarm skenën politike. Sipas të dhënave të fundit të publikuara nga Enti Shtetëror i Statistikave, gjatë muajit tetor të këtij viti është shënuar një rritje prej 3.3% e kostos së jetesës, krahasuar me periudhën e njëjtë të vitit të kaluar, ndërsa çmimet me pakicë kanë pësuar një ngritje prej 3.2%, theksohet në nomimin e sotëm për media të LSDM-së. Nga kjo parti politike vlerësojnë se nën udhëheqjen e kryeministrit Hristijan Mickoski, mirëqenia e qytetarëve po degradon çdo ditë e më shumë. "Vlera e shportës sindikale të konsumatorit për muajin tetor ka kaluar shifrën e 70.000 denarëve, ndërsa nëse llogaritet edhe qiraja, ajo arrin në afro 90.000 denarë, gjersa paga minimale mbetet e ngurtësuar në kuotën e 26.000 denarëve", thuhet në reagim, duke shtuar se tre paga mesatare nuk mjaftojnë për të mbuluar shpenzimet elementare. Sipas opozitës, punonjësit në vend po përballen me mbijetesën, duke u renditur me të ardhurat më të ulëta në kontinentin evropian. Nga gjithsej 540.000 të punësuar, rreth 180.000 prej tyre marrin një pagë mujore më të vogël se 31.200 denarë. LSDM thekson se kreu i ekzekutivit refuzoi kategorikisht rritjen e pagës minimale në 600 euro, me arsyetimin se nuk ka fonde për mbështetjen e qytetarëve, ndërkohë që fondet publike, sipas tyre, orientohen drejt tenderëve partiakë. Ndërkohë, paralajmërimet për shtrenjtimin e rrymës dhe ngrohjes për vitin e ardhshëm vijnë në një kohë kur buxhetit i mungojnë mjetet për ndihmë sociale. Kjo parti po ashtu akuzon qeverisjen se e ka sjellë shtetin në gjendje kolapsi financiar me një deficit prej afër 900 milionë eurosh, duke paralajmëruar se huamarrjet e reja të shtrenjta do të rëndojnë mbi supet e qytetarëve dhe gjeneratave të ardhshme. "Kjo është pasojë e drejtpërdrejtë e keqqeverisjes gjatë kësaj periudhe: arka e shtetit e boshatisur, miliarda borxhe të reja, punëtorë të lënë pa të ardhura dhe një standard jetese i rrënuar plotësisht", përfundojnë nga LSDM.