Vjosa Osmani nderohet me çmimin ndërkombëtar të diplomacisë në Turqi

Ish-presidentja e Kosovës, Vjosa Osmani, është vlerësuar me çmimin prestigjioz “Global Diplomacy Award”. Ceremonia e ndarjes së këtij çmimi u organizua në Turqi, nën kujdesin e organizatës “Global Journalism Council”, ku morën pjesë mbi 350 delegatë nga 32 vende të ndryshme të globit. Pasi pranoi këtë mirënjohje, Osmani theksoi rëndësinë e diplomacisë, duke e cilësuar atë si një mjet thelbësor që shërben për të ngritur ura komunikimi dhe për të mbrojtur gjithmonë parimet e drejtësisë. “Këtë çmim ia dedikoj, sikurse çdo çmim tjetër, popullit të përvuajtur të Kosovës, i cili sakrifikoi gjithçka, deri edhe fëmijët në djep, që ne sot ta gëzojmë lirinë. Njëkohësisht, ia dedikoj Atit themeltar të Republikës sonë, Presidentit Ibrahim Rugova, i cili na mësoi rëndësinë e aleancave, të ndërtimit të urave dhe të kultivimit të miqësive”, ka shkruar Osmani në mesazhin e saj. Gjatë fjalës së saj, ajo i kushtoi një vëmendje të veçantë edhe kontributit të medias, duke e vlerësuar këtë çmim si një homazh për gazetarët e luftës në Kosovë, të cilët rrezikuan jetën për të dokumentuar të vërtetën dhe për të ndihmuar në shpëtimin e qytetarëve. “Sepse gazetaria e guximshme nuk është vetëm dëshmi e historisë, por edhe mbrojtje e jetës dhe e njerëzimit”, përfundoi Osmani.