Prapaskenat e vitit 1999: Pse presidenti historik Ibrahim Rugova iu shmang aeroportit të Rinasit?

Publicisti dhe ish-kryeredaktori Gani Mehmetaj ka sjellë në vëmendje një ngjarje të bujshme të marsit të vitit 1999, e cila lidhet me kthimin e presidentit historik Ibrahim Rugova nga bisedimet e Rambujesë. Nëpërmjet një postimi në rrjetet sociale, Mehmetaj ka shpjeguar se lideri i Kosovës kishte shmangur uljen në aeroportin e Rinasit në Tiranë, për shkak të dyshimeve serioze se po përgatitej një atentat ndaj tij në territorin shqiptar. Për arsye sigurie në atë periudhë kur shteti shqiptar ndodhej në kaos, ai kishte zgjedhur aeroportin e Shkupit. Megjithëse partnerët ndërkombëtarë e kishin këshilluar të strehohej në ndonjë prej kryeqyteteve evropiane derisa situata të qetësohej, Rugova kishte shfaqur vendosmëri të plotë për t'u kthyer pranë qytetarëve të tij. Sipas autorit, ai mendonte se largimi nuk do të kishte asnjë kuptim dhe se nuk do t'ia falte kurrë vetes një gjë të tillë, duke këmbëngulur të kthehej në atdhe me çdo kusht. Në ato momente tensioni, në opinionin publik qarkullonte mesazhi se askush nuk guxonte të braktiste vendin, sipas parimit se "toka pa zot është tokë e humbur". Pjesë e këtij rrëfimi historik është edhe libri i Gani Mehmetajt, “Rugovën si kam njohur”, i cili është botuar në Tiranë nga shtëpia botuese UET Press.