Rrëfimi i grabitësit të bankave: 120 mijë eurot i humba në kazino, pjesën tjetër ua dhashë miqve

Pas një operacioni të mirëorganizuar, Policia Kriminale e Tiranës ka vënë në pranga Robert (Albert) Dukën, autorin e dyshuar të dy grabitjeve të bujshme të bankave në kryeqytet. Identifikimi i tij u bë i mundur falë një sërë provash, përfshirë përgjimet telefonike, analizimin e detajuar të pamjeve të sigurisë dhe gjurmimin e automjetit që autori kishte marrë me qira. Sipas hetimeve, shuma prej rreth 120 mijë eurosh, e vjedhur nga filialet e 'OTP Bank' dhe 'Raiffeisen Bank', thuajse është zhdukur. Duka ka deklaruar përpara hetuesve se pjesën më të madhe të parave e ka shpenzuar në lojëra fati në disa kazino të Tiranës. Ndërkohë, një pjesë tjetër, prej 6 mijë eurosh, i është dhënë dy personave në Vlorë, të cilët pretendojnë se paratë ishin shlyerje e një borxhi të vjetër. Kjo shumë është sekuestruar tashmë nga policia, ndërsa në banesën e të arrestuarit janë gjetur vetëm 2 200 euro. Autoritetet kanë nisur verifikimet pranë katër kazinove të kryeqytetit për të konfirmuar nëse Duka ka qenë klient i tyre, duke kërkuar dokumentacionin dhe pamjet filmike përkatëse. Megjithatë, duhet theksuar se këto deklarata të autorit janë bërë në biseda jozyrtare me efektivët dhe prokurorin, pasi avokati mbrojtës nuk e ka lejuar klientin e tij të japë dëshmi me procesverbal zyrtar. Në kuadër të hetimeve, është marrë në pyetje edhe bashkëshortja e të arrestuarit, e cila është punonjëse banke. Ajo ka deklaruar se 120 mijë eurot e gjetura në llogaritë e tyre rrjedhin nga shitja e një apartamenti te 'Air Albania' dhe se nuk kishte dijeni për aktivitetin kriminal të bashkëshortit. Pas dëshmisë, ajo është lënë e lirë, ndërsa Duka përballet me akuzën e 'Grabitjes me armë', vepër që parashikon dënim deri në 20 vite burgim. Ndërkohë, grupi hetimor është duke punuar për të zbardhur nëse Duka ka pasur bashkëpunëtorë. Dyshohet se një person i dytë e ka ndihmuar për t'u larguar me automjet pas grabitjes së 2 qershorit 2026. Mënyra e operimit në të dyja rastet – më 2 qershor dhe 2 nëntor 2026 – shfaq ngjashmëri të habitshme, ku autori, i maskuar, ka hyrë me shpejtësi në banka dhe në rastin e parë është larguar nga vendngjarja me një monopatinë elektrike.