Alarm për klimën: 2026-ta pritet të thyejë çdo rekord të temperaturave globale

Planetit Tokë po i afrohet një tjetër prag kritik. Shkencëtarët kanë dhënë alarmin se viti 2026 ka gjasa të shënohet në histori si periudha më e nxehtë e regjistruar ndonjëherë, si pasojë e ndikimit të kombinuar të ndryshimeve klimatike dhe fenomenit natyror El Niño. Sipas të dhënave nga grupi kërkimor amerikan Berkeley Earth, probabiliteti që viti 2026 të tejkalojë temperaturat rekord të vitit 2024 është 95 për qind. Në të njëjtën linjë, Organizata Botërore Meteorologjike (WMO) parashikon se 2026 do të renditet mes katër viteve më të ngrohta të historisë, ndërsa efekti i El Niño pritet të shtrijë ndikimin e tij edhe gjatë vitit 2027, duke rritur më tej presionin termik mbi planet. Ekspertët theksojnë se thelbi i kësaj krize mbetet rritja e përqendrimit të dioksidit të karbonit në atmosferë, një pasojë e drejtpërdrejtë e përdorimit masiv të lëndëve djegëse fosile. Ky zhvillim shqetësues përkon me mbajtjen e samitit të OKB-së për klimën, COP31, në Turqi. Gjatë këtij samiti dyjavor, liderët botërorë janë mbledhur për të diskutuar mbi strategjitë e frenimit të emetimeve të gazrave serrë, tranzicionin drejt energjisë së pastër dhe menaxhimin e pasojave të ndryshimeve klimatike. Megjithatë, parashikimet aktuale janë pesimiste, duke treguar se Toka mund të përballet me një ngrohje prej 2.8 gradësh Celsius deri në fund të shekullit, shifër kjo që tejkalon frikshëm limitin prej 1.5 gradësh të parashikuar nga Marrëveshja e Parisit.