Hetimet e FBI-së: Donald Trump zbulon detaje mbi lidhjen e kreut të Nvidia-s me të dyshuarën për spiunazh

Presidenti amerikan Donald Trump ka konfirmuar se Byroja Federale e Hetimeve (FBI) po zhvillon hetime lidhur me kontaktet mes drejtorit ekzekutiv të gjigandit teknologjik Nvidia, Jensen Huang, dhe një shtetaseje të dyshuar si agjente e inteligjencës kineze. Kreu i Shtëpisë së Bardhë bëri të ditur se ka pasur një komunikim të drejtpërdrejtë me Huang të hënën, në vijim të lajmeve se autoritetet e sigurisë në Shtetet e Bashkuara dyshojnë se drejtuesi i njohur është bërë cak i operacioneve të spiunazhit nga Pekini. Gjatë kësaj bisede, Trump e pyeti nëse ishte në dijeni të prapaskenave të gruas në fjalë, ndërsa CEO i Nvidia-s mohoi çdo njohuri se ajo mund të ishte e përfshirë në aktivitete ilegale, një shpjegim të cilit presidenti tha se i beson. Nga ana tjetër, autoritetet në Pekin i kanë hedhur poshtë kategorikisht pretendimet, duke i cilësuar ato si hamendësime të pabazuara dhe të orkestruara me qëllim dëmtimin e reputacionit të shtetit kinez. Ndërkohë, drejtuesit e Nvidia kanë ndërmarrë hapa konkretë duke nisur një verifikim të pavarur mbi këtë situatë që përfshin Alice Huang, e cila dyshohet si agjente e Pekinit. Kompania ka siguruar se deri më tani nuk ka asnjë element që sugjeron rrezikimin e sekreteve korporative apo cënimin e sigurisë kombëtare. Megjithatë, zhvillimet kanë pasur kosto të lartë në bursa. Nvidia, e cila mban pozitat si entiteti i dytë financiarisht më i madh në glob pas Apple, pësoi një goditje të rëndë të hënën, duke regjistruar një zhvlerësim prej rreth 250 miliardë dollarësh pasi kuotat e saj shënuan rënie mbi 4%. Edhe pse Trump risolli në vëmendje angazhimin e FBI-së në këtë dosje, ai nuk pranoi të ndalet te hollësitë e procedurave hetimore apo koha se kur kanë nisur zyrtarisht verifikimet. Sipas të dhënave të publikuara nga e përditshmja “The New York Times”, strukturat e inteligjencës amerikane janë të bindura se Alice Huang, e cila identifikohet gjithashtu si Huang Le dhe nuk ka asnjë lidhje gjaku me Jensen Huang, ka shërbyer si spiune për llogari të qeverisë kineze.