Flakët përfshijnë disa banesa pranë Bit Pazarit në Shkup, zjarrfikësit neutralizojnë rrezikun

Një zjarr i fuqishëm ka rënë ditën e djeshme pasdite në zonën përreth Bit Pazarit në kryeqytetin e Maqedonisë së Veriut, duke shkaktuar dëme të konsiderueshme materiale në disa shtëpi, përpara se autoritetet të arrinin ta vendosnin situatën nën kontroll. Detalet mbi ndërhyrjen i ka bërë të ditur për agjencinë e lajmeve AIM, komandanti i Brigadës së Zjarrfikësve të Shkupit, Zvonko Tomeski. Sipas tij, bëhet fjalë për banesa private ku flakët fillimisht kapluan kulmin e një objekti dykatësh. “Bëhet fjalë për shtëpi individuale. Çatia e një shtëpie dykatëshe u vu në flakë, nga e cila, për shkak të afërsisë së ndërtesave, janë prekur pjesë të dy shtëpive të tjera”, ka sqaruar Tomeski, duke theksuar se vatra prapa tregut tashmë është neutralizuar plotësisht dhe po punohet për shuarjen përfundimtare të saj, ndërkohë që në terren janë angazhuar 22 zjarrfikës me nëntë automjete. Sipas kreut të zjarrfikësve të Shkupit, autoritetet kompetente ende nuk kanë një përllogaritje zyrtare për vlerën e saktë të dëmeve materiale të shkaktuara nga ky incident.