Deputeti i LSDM-së, Bytyqi kërkon llogari nga Qeveria: Prania e Alta Bankës në vend përbën rrezik për kapital të dyshimtë

Deputeti i Lidhjes Socialdemokrate të Maqedonisë (LSDM), Fatmir Bytyqi, ka shprehur shqetësimet e tij lidhur me procedurat që i kanë hapur rrugë hyrjes së Alta Bankës në tregun financiar vendas, duke kërkuar transparencë dhe përgjigje zyrtare nga ekzekutivi dhe Banka Popullore. Gjatë një paraqitjeje televizive në emisionin “Debat në Shenja”, ligjvënësi opozitar theksoi se kjo çështje është ngritur nga subjekti i tij politik prej më shumë se një viti e gjysmë, duke kërkuar që rasti të analizohet nën dritën e ngjarjeve në Serbi dhe ndikimeve të mundshme gjeopolitike e ekonomike në rajonin tonë. “Është pozitive që kjo temë po trajtohet publikisht, pasi ne si LSDM jemi angazhuar për ta sjellë në vëmendje prej rreth një viti e gjysmë. Kjo situatë është pasojë e pyetjes se si u lejua pikërisht Alta Bank në vendin tonë. Ne pyesnim pse u zgjodh kjo bankë dhe jo institucione të tjera, duke pasur parasysh se ajo nuk gëzon një reputacion pozitiv dhe pronari i saj është përballur me sanksione nga banka qendrore dhe është përfshirë në lista të zeza. Të gjithë jemi dëshmitarë të asaj që ndodh tani në Serbi, ku ai është arrestuar”, u shpreh Bytyqi. Sipas tij, fondet financiare shpesh nuk kanë qenë brenda strukturave bankare, por kanë ekzistuar vetëm në letër. Për këtë arsye, ai ka përsëritur thirrjen drejtuar Qeverisë dhe Bankës Popullore që të sqarojnë opinionin publik mbi kriteret e lejimit të këtij institucioni. “Ne e cilësojmë këtë si depërtim të një kapitali koroziv. Shtrohet pyetja nëse prezenca e Alta Bankës shërbeu si mekanizëm ndikimi, i ngjashëm me atë që Komisioni Evropian e përmend si ‘botë serbe’ në Maqedoni, apo nëse bëhet fjalë për shlyerjen e një detyrimi që Qeveria jonë ia ka pasur patronit të tyre, [Aleksandar] Vuçiq”, përfundoi deklaratën e tij deputeti Bytyqi.