Arian Curri: Klasa politike shmang ndryshimin zgjedhor, shpresa mbetet tek qytetarët

Çështja e Reformës Zgjedhore dhe mundësia që ajo u jep qytetarëve për të përzgjedhur në mënyrë direkte përfaqësuesit e tyre kanë qenë në qendër të diskutimeve gjatë emisionit “Top Story”, i moderuar nga Grida Duma. I ftuar në këtë studio, analisti Arian Curri analizoi lidhjen komplekse mes politikës, financimeve dhe lobimit ekonomik, duke sjellë një krahasim mes realitetit amerikan dhe atij shqiptar. Gjatë fjalës së tij, Curri vuri në dukje skepticizmin e tij lidhur me vullnetin real të subjekteve politike për t'i dhënë jetë një reforme të vërtetë, ndërsa theksoi se e vetmja alternativë mbetet reagimi qytetar për të sjellë një rotacion të merituar në udhëheqjen e vendit. Duke u ndalur te modelet ndërkombëtare, ai u shpreh: “Në Shtetet e Bashkuara të Amerikës kjo që ne i themi korrupsion, quhet lobizëm. Në SHBA analistët thonë se shikoni se kush mbledh më shumë para gjatë fushatës, fiton. Në Amerikë e ka pushtetin Trump, CIA, FBI, apo të gjithë bashkë, në një lojë fuqie. Në Shqipëri, prapë mendoj, se nëse themi oligarku më i madh është Rama, këtu mbaron. Por nëse themi se ka më shumë, ata se kanë problem se kush fiton, se prapë do marrin tendera”. Në vijim të bisedës, i pyetur drejtpërdrejt nga Grida Duma nëse vëren ndonjë lëvizje apo zhvillim konkret në prag të zgjedhjeve, analisti u përgjigj hapur: “Shikoj që të dyja partitë do thonë nuk do tjetra. PS thotë ua jap 100 për qind, na duhen 101 deputetë. Do gjejnë justifikim. Pikëpyetja është se populli ynë demokratik a do e ketë fuqinë ta përmbysë këtë klasë politike. Unë shpresoj se do ndodhë kjo”.