Lëndimi detyron Arijon Ibrahimovic të lërë pas dore Kombëtaren e Gjermanisë U21

Talenti i madh me origjinë nga Kosova, Arijon Ibrahimovic, është detyruar të braktisë grumbullimin e Përfaqësueses së Gjermanisë U21, duke humbur kështu dy sfidat e ardhshme miqësore kundër Belgjikës dhe Kroacisë. Mesfushori ofensiv u detyrua të lërë fushën e lojës në përfundim të pjesës së parë, gjatë duelit ku skuadra e tij u mposht me rezultatin 5-2 nga RB Leipzig në kuadër të kampionatit gjerman. Pas kësaj mungese, trajneri Antonio Di Salvo ka reaguar menjëherë duke thirrur Maurice Krattenmacher për të zëvendësuar Ibrahimovicin, ndërkohë që listës i janë shtuar edhe Tom Rothe dhe Kofi Amoako për shkak të dëmtimeve të tjera në ekip. Ibrahimovic, i cili aktivizohet te Augsburgu si huazim nga Bayern Munichu deri në përfundim të këtij edicioni, ka regjistruar shtatë paraqitje në elitën e futbollit gjerman, ku ka arritur të shënojë një herë dhe të kontribuojë me një asistim, krahas një goli të realizuar në Kupën e Gjermanisë. Situata e tij sportive vazhdon të jetë në qendër të vëmendjes mediatike, veçanërisht për shkak të interesimit konkret nga Kombëtarja e Kosovës. Vetë selektori i “Dardanëve”, Franco Foda, konfirmoi gjatë ditës së sotme në konferencën për shtyp se është në pritje të vendimit përfundimtar nga lojtari. Kështu, e ardhmja e tij ndërkombëtare mbetet e hapur dhe pritet të kuptohet në ditët në vijim nëse Arijoni do të pranojë ftesën e Kosovës apo do të vazhdojë rrugëtimin e tij me fanellën e Gjermanisë.