Suhareka përkrah blegtorët me 63 lopë, projekti ambicioz synon mbi 100 krerë për vitin e ardhshëm

Sektori i blegtorisë në Suharekë ka marrë një mbështetje të rëndësishme, pasi autoritetet komunale kanë bërë shpërndarjen e 63 krerëve të lopëve për fermerët vendas. Banorët përfitues kanë shprehur mirënjohjen e tyre, duke theksuar se ky investim do t'u mundësojë zgjerimin e tufave dhe intensifikimin e prodhimit të vendit. Ndërkohë, drejtuesit e komunës tashmë kanë gati planin që gjatë vitit që vjen të dyfishojnë përpjekjet, duke ndarë më shumë se 100 krerë të tjerë për bujqit e zonës. Kjo nismë synon fuqizimin e ekonomive familjare dhe stimulimin e prodhimit vendor të qumështit e nënprodukteve të tij. Përfituesit e këtij subvencioni e shohin këtë si një mundësi të artë për të zhvilluar bizneset e tyre bujqësore, të cilat shpesh janë ndeshur me mungesë të mjeteve financiare. "Dy i kam pasur, tash edhe një tjetër. E falënderoj komunën. Kam pasur dëshirë t'i shtoj lopët, por nuk kam pasur mundësi. I kam tre studentë në shtëpi dhe nuk kam mundur të ndaj para për studentët dhe për të blerë lopë. Synimi im është që ta rris tufën në pesë lopë", tha Hedi Jakupi, përfitues. "Kjo ndihmë na ndihmon shumë. Fshati ynë ka mbi një mijë shtëpi, por ka shumë pak lopë, ndërsa kërkesa për qumësht është e madhe. Besoj se me rritjen e numrit të lopëve do të rriten edhe të ardhurat. Jemi gjashtë anëtarë të familjes dhe jetojmë nga ky biznes, duke prodhuar qumësht dhe djathë. Prandaj, synojmë ta zgjerojmë veprimtarinë tonë", theksoi Bardhyl Zyrapi, përfitues. Realizimi i këtij projekti është bërë i mundur falë bashkëpunimit të ngushtë me organizatën joqeveritare "Mështjerra", e cila ka dhënë kontributin e saj në terren për mbarëvajtjen e procesit. "Kemi një marrëveshje me organizatën "Mështjerra". Vitin e kaluar kemi dhuruar 60 krerë lopë, këtë vit do t'i ndajë 63, ndërsa vitin e ardhshëm mbi 100. Arsyeja kryesore është edhe rritja e çmimit të qumështit dhe djathit. Qëllimi ynë është t'i ndihmojmë sa më shumë bujqit, pasi këto produkte mbeten në vendin tonë dhe konsumohen nga qytetarët tanë", tha Bali Muharremaj, kryetar i Komunës së Suharekës. Nga ana tjetër, Drejtoria e Bujqësisë vlerëson se nisma të tilla janë të domosdoshme për të ulur varësinë e vendit nga importi i produkteve ushqimore blegtorale dhe për të stimuluar prodhimtarinë vendase. "Duke u konsultuar me fermerët, kemi parë të domosdoshme realizimin e këtij projekti, pasi importi i qumështit dhe i mishit në Kosovë vazhdon të jetë i lartë. Projekte të tilla duhet të mbështeten si nga Qeveria, ashtu edhe nga komunat, në mënyrë që ta forcojmë këtë sektor, i cili ende nuk është mjaftueshëm i zhvilluar në Kosovë", pohoi Armend Krasniqi, drejtor i Bujqësisë në Komunën e Suharekës. Procesi i dorëzimit të bagëtive do të vijojë edhe gjatë javës në vijim, kohë kur është parashikuar të shpërndahet kontingjenti i radhës për fermerët që përfitojnë nga ky program mbështetës.