Në ftesë të Macron, kryeministri Rama udhëton drejt Parisit për Forumin e Paqes

Kryeministri Edi Rama do të jetë i pranishëm në edicionin e sivjetshëm të Forumit të Paqes në Paris, pasi ka pranuar ftesën zyrtare të kreut të shtetit francez, Emmanuel Macron. Në qendër të diskutimeve këtë vit do të jetë roli i një qeverisjeje sa më efikase për të siguruar paqe afatgjatë, stabilitet dhe zhvillim ekonomik, sidomos në këtë periudhë kur arena ndërkombëtare po përballet me transformime të thella gjeopolitike, risi teknologjike dhe emergjenca klimatike. Gjatë këtij samiti ndërkombëtar, kreu i qeverisë shqiptare do të ketë një adresim të veçantë në sesionin “Spotlight”. Aty ai do të flasë rreth të ardhmes evropiane dhe peshës që ka procesi i integrimit në Bashkimin Evropian për brezat e ardhshëm. Po ashtu, Rama do të përfshihet edhe në seancën plenare të këtij eventi prestigjioz, e cila mban titullin “From Sovereignty to Cooperation” (Nga sovraniteti te bashkëpunimi). Në këtë panel diskutimor parashikohet të analizohen aspektet e ndryshme të partneritetit global dhe sfidat aktuale që shoqërojnë ndërveprimin mes shteteve në skenën ndërkombëtare.