Ministri Maqedonci pret ambasadorin belg: Vëmendje e veçantë partneritetit në fushën e sigurisë

Ministri i Mbrojtjes, Ejup Maqedonci, ka zhvilluar një takim zyrtar me ambasadorin e ri të Mbretërisë së Belgjikës në Kosovë, Arnaud Dusaucy, i cili po realizon vizitën e tij të parë në këtë institucion që nga marrja e mandatit. Gjatë këtij takimi, dy zyrtarët trajtuan mundësitë për intensifikimin e marrëdhënieve dypalëshe, me theks të veçantë te sektori i mbrojtjes dhe sigurisë. Gjatë bisedës, kreu i Mbrojtjes së Kosovës i ka përcjellë diplomatit belg mirënjohjen e tij për ndihmën e pandërprerë që Brukseli i ka dhënë vendit tonë, veçanërisht në ngritjen e kapaciteteve të sigurisë dhe mbrojtjes. Në një reagim të bërë publik në rrjetet sociale, ministri Maqedonci theksoi se fokusi i bisedimeve ishte zgjerimi i bashkëpunimit bilateral. Ai veçoi rëndësinë e akreditimit të atasheut të mbrojtjes së Republikës së Kosovës në Belgjikë, si dhe domosdoshmërinë e jetësimit të letërqëllimit të përbashkët ndërmjet dy qeverive, me qëllim forcimin e partneritetit strategjik ushtarak. Në përmbyllje të takimit, ministri Maqedonci i uroi ambasadorit Dusaucy suksese në përmbushjen e detyrës së tij diplomatike në Kosovë, duke rikonfirmuar vullnetin e plotë institucional për të vazhduar dhe pasuruar tutje bashkëpunimin e ndërsjellë mes Prishtinës dhe Brukselit.