Zgjedhjet për KKSH, Kamberi shtrin dorën e bashkëpunimit: Synojmë një Këshill pa opozitë

Kryetari i Partisë për Veprim Demokratik (PVD), Shaip Kamberi, u ka bërë thirrje subjekteve të tjera politike që garuan në zgjedhjet për Këshillin Kombëtar Shqiptar (KKSH) në Luginë të Preshevës, që të bashkojnë forcat për themelimin e këtij institucioni. Kamberi ka theksuar se fryma e bashkëpunimit që u dëshmua gjatë zgjedhjeve parlamentare në Serbi duhet të shërbejë si model dhe të shtrihet edhe në procesin e konstituimit të KKSH-së. "Në cilësinë e kryetarit të PVD-së, ftoj të gjitha listat zgjedhore që të bëhemi bashkë dhe të ndajmë së bashku barrën e përgjegjësisë për udhëheqjen e KKSH-së. Bazuar në rezultatet preliminare, lista jonë me numër 3, e kryesuar nga Enkel Rexhepi, ka siguruar mbështetjen më të madhe të votuesve. Është e rëndësishme të respektojmë vullnetin e qytetarëve dhe peshën e votës për secilën listë," ka deklaruar ai. Duke arsyetuar këtë nismë, ai ka vlerësuar se të katër listat duhet të përfshihen drejtpërdrejt në procesin e vendimmarrjes, duke shmangur ndarjen tradicionale mes shumicës dhe pakicës parlamentare. "Angazhimi ynë është i qartë: Këshilli Kombëtar Shqiptar nuk duhet të ketë opozitë. Prandaj, le të bashkohemi ashtu siç vepruam gjatë garës për zgjedhjet parlamentare," ka përfunduar Kamberi.