Ministri Peci falënderon qytetarët për mbështetjen pas intervistimit nga organet e drejtësisë

Publikuar më: Ministri i Bujqësisë, Pylltarisë dhe Zhvillimit Rural, Faton Peci, ka shprehur mirënjohjen e tij ndaj qytetarëve, miqve dhe familjarëve për solidaritetin dhe shqetësimin e treguar pas intervistimit të tij nga organet e rendit dhe drejtësisë. Në një reagim publik, ministri Peci i ka adresuar një falënderim të veçantë mbi 133 mijë qytetarëve që, siç ka theksuar ai, i kanë dhënë “gjënë më të shenjtë – besimin” për ta përfaqësuar në institucionet shtetërore. Ai është shprehur i bindur se epilogu i këtij procesi do të jetë i qartë për të gjithë, njësoj si për rreth 30 mijë fermerë të Kosovës që përfitojnë çdo vit subvencione dhe grante përmes Ministrisë së Bujqësisë. Sipas tij, këta fermerë janë dëshmitarët më të mirë të punës dhe përkushtimit të tij institucional. “Çdo shkronjë, çdo fjalë – e shkruar apo e thënë – është e qasshme për secilin që ka interesim,” ka theksuar ministri, duke ritheksuar transparencën dhe gatishmërinë për t’u përballur me çdo sqarim ligjor e publik. Ministri Peci e ka përmbyllur reagimin e tij me një reflektim të thellë për vendin, duke vlerësuar Kosovën si një tokë të bekuar dhe popullin e saj si të mrekullueshëm, me besim të palëkundur se mbi këtë vend qëndron drejtësia dhe Zoti.